【流行經典50年】關心妍唱《講不出聲》　網友：同關菊英出合唱版

唔少女士本身事業發展一帆風順，為咗生兒育女決定急流勇退，將時間心機放曬喺小朋友身上，關心妍就係其中一個好例子，16年中誕下囡囡楊榮心後，Jade工作量大減專心相夫教女，以及出席慈善活動。呢日佢終於再亮相無綫節目《流行經典50年》，除咗一系列慘情金曲，居然獻唱關菊英經典名曲《講不出聲》，又令人諗起當年搶獎事年，乜咁大整蠱呀﹗

2009年1月TVB舉行《2008年十大勁歌金曲頒獎典禮》，主持曾志偉同崔建邦宣布「年度傑出表現獎金獎」得主係關菊英，點知聽到個關字，Jade就一個箭步衝出嚟接過獎項，台上台下都一面錯愕。呢件勁尷尬嘅事令Jade個名以後都同菊姐剪不斷理還亂。

估唔到隔咗9年後，關心妍重返電視節目，除咗唱出自己嘅金曲《放生》、《優先訂座》、《你有心》，居然仲唱出關菊英經典名曲《講不出聲》﹗一邊聽到Jade悅耳嘅聲線唱出「講不出聲講不~出聲，任由自己~半夜驚醒」，個腦都不禁浮現當年搶獎嘅畫面，網友都話乜TVB咁大整蠱呀……其實《2015年十大勁歌金曲頒獎典禮》上，關心妍得獎時又遇著崔建邦做主持，接過獎座後Jade笑言「無搞錯喇今次，唔使擔心！」唔理係佢自己揀歌定被安排唱《講不出聲》，久休復出立即引起話題都未嘗唔係件好事。