做日資連鎖店網友呻好難捱？　譚凱琪：佢哋嘅文化好分階級

日本人出名好注重禮貌好守規矩，近日就有網民於討論區開post講本港某間日資時裝連鎖店守則條例多多，其員工都大吐苦水話好難捱，其他網民亦紛紛表示幫日資公司打工實在太多嘢要遵守。曾經到過日本留學兼發展，更是小室哲哉徒弟的譚凱琪 (Zoie) 也認同日本人確是好多規矩。她說：「日本人做事好有條理，佢哋嘅文化好分階級，好講求禮貌，長輩同平輩用嘅語言都唔同，所以有好多條例要導守係唔奇嘅。」

Zoie直言作為外國人可能較難適應，甚至會覺得好奇怪，但作為日本本土的人就已經習以為常：「佢哋由細到大都係咁，自小培養。」至於她自己在當地的親身經驗，Zoie表示：「佢哋好多嘢講，除咗基本嘅唔該多謝，仲有好多客氣說話，例如入屋、出門、食飯、放工等等咩都要叫人同講聲，要講多多指教、辛苦晒、麻煩晒之類。不過正所謂禮多人不怪，係好事嚟，喺人哋地方都要遵從人哋嘅文化。」