【棟仁的時光】胡鴻鈞唱主題曲蝦碌失準 原來多得賴慰玲搞搞震
為隆重推介新劇《棟仁的時光》，袁偉豪、唐詩詠、朱晨麗、胡鴻鈞（Hubert）、黃長興等一眾演員齊聚尖沙咀出席宣傳活動，期間Hubert更即場演唱劇集主題曲《最難忘一天》。未知是否因現場fans太多太熱情導致難以控制，Hubert的表現因而有點受影響。
對此他解釋：「啲fans平時都唔係咁架，平時係正常跟我唱架嘛，真係多得賴慰玲囉，佢次次都係咁架，每一次我做劇集宣傳唱主題曲嘅時候呢，佢就會喺隔離喧嘩起鬨，搞到我好分心。因為呢啲劇集宣傳好多時我都係第一次現場唱，難免會緊張啲，即係我一疾咗就會唔記得歌詞，所以頭先真係……唉，不過算啦，我都唔可以賴人嘅，係自己準備不足，頭先又唔記得歌詞，又忍唔住笑咁樣囉。」問到可會找機會向賴慰玲「尋仇」，Hubert表示不會怪責對方，因為大家只是關係熟絡開開玩笑，但同時求求她放過自己，不要再作弄他。
活動現場所見，十有八九都是Hubert的fans，人氣相當高漲，就連朱晨麗也開他玩笑：「你真係好多fans呀，你睇吓你啲fans，快啲同佢哋揮下手啦。」其實他的人氣不只於香港，就連日前上廣州進行簽唱會，一樣有大批fans撐場，Hubert坦言是始料未及的事，因此他看到現場的熱鬧情況後也深受感動，更表示日後可能會到內地不同地方再做簽唱會，希望宣傳自己的音樂。這豈不是與當年林峯初出道時的情況相似？劇集角色受歡迎，歌唱方面又被讚揚，然後四出舉行簽唱會。對此，Hubert謙遜地說：「嘩！我差好遠，咁當然佢係我學習對象啦，演而優則唱，我都希望各方面可以慢慢進步。」
Hubert現時的人氣如此之高，不順勢舉行個人演唱會更待何時？
「開騷係一直同公司商量緊，如果開嘅話將會係我第一個個人賣飛演唱會，所以我都唔想太魯莽、草率，都希望喺一個最佳狀態同最好timing先去開個唱。其實目前呢刻要做嘅就係出多啲歌先，推出多啲自己原創音樂。」他深思熟慮地回應。
【棟仁的時光】生命剩30小時會做啲咩？ 胡鴻鈞：約晒啲朋友食飯
【棟仁的時光】林子善35歲買兩層樓 除一人打3份工仲有乜秘技？