【棟仁的時光】林子善35歲買兩層樓　除一人打3份工仲有乜秘技？

林子善2日前才剛與女友董佩欣（Kary）舉行婚禮，今日(6日)就已經投入工作作出席新劇《棟仁的時光》的宣傳活動。林子善接受《香港01》訪問時說：「我今日收工之後仲要去還衫，不過我太太就已經過咗去泰國個單身派對。我就繼續喺香港工作。渡蜜月都未有咁快，因為我要完成埋套網絡大電影，起碼5月尾先去到。因為宜家呢套劇係我好兄弟監製，佢都有話『不如你唔好拍，去完渡蜜月先啦』，我話『唔得，你嘅劇有預我嘅我好想參與』。我話『我唔去旅行，唔去渡蜜月我都要拍埋先，同你一齊打埋仗先』。所以我會拍完套劇先去渡蜜月。」就咁聽都感覺到「洪爺」嗰份熱血。

林子善（人稱洪爺）除了對「兄弟」「朋友」出名好之外，對自己親人亦是如是。在娛樂圈拼博多年的他，原來早在幾年已將購得的三層高村屋贈於父母居住，之後又幫助親大佬俾埋首期「上車」買樓。林子善：「買俾爸爸媽咪層樓已經買咗好耐啦，雖然層樓個名係我，但係喺我嘅角度係唔屬於我。（會唔會買返層俾自己同老婆？）會，我希望出年可以生小朋友，所以短期內我要開始『跑山』跑個首期返嚟。」。

林子善婚宴勁墟冚多星過台慶 楊怡羅仲謙手拖手出現苟姑娘最省鏡

林子善大婚感觸眼紅紅多謝老婆：會當外父外母係自己阿爸阿媽

到底林子善是如何儲錢買樓呢？林子善說：「老實講我搵錢唔多，譬如開工時間，喺TVB使費唔算多。好多時去到外景都會有飯包埋，所以食飯就唔需要自己俾。如果喺TVB入面拍戲，就係TVB飯堂食飯，因為好抵食。（註：約$30一個碟頭飯）如果喺屋企，我每日朝早就會落鋪頭食，之後做完運動，就會去買餸，每日2個人使費大約係$150-$200一餐。」

驟眼睇，$150一餐飯好似好貴。林子善屋企又會請工人，又要供樓。其實子善在慳錢之餘，更會想辦法增加收入。「其實我係做緊3份工。我冰室鋪頭有生意啦，我會自己去睇。我又要拍劇拍戲，之後有機會嘅話我仲要去打碟做DJ。但係出面啲人成日話一個月淨係搵1萬蚊儲唔到錢，梗係啦，你只係做1份職業，但係我係做緊3份職業。大部份人放假嘅時候我都喺度返工，基本上我係全年冇休息。就算放假我都係留喺屋企或者落健身室，只係$700一個月。同朋友食飯我都係去食百幾蚊嘅自助餐任食。平時出入我都唔揸車嘅，油費停車場又可以慳返。」

林子善：「我一日唔會用超過$200，一個月最多用$6000。我一個月正常都係搵2萬幾，如果冇劇開的話。所以如果要儲首期嘅話，係要靠老細請我去打碟，或者夜場出show，再慳慳埋埋先搵到。」