【掟狗落街】刑罰要同謀殺睇齊？　宣萱支持重判：動物都係生命

宣萱（Jessica）愛狗愛到出哂名，之前喺訪問憶述返自己其中一隻愛犬離世嘅過程時都顯得非常感概。對於近日一名23歲嘅男主人喺深水埗掟自己隻白色銀狐犬落街分屍嘅案件，Jessica亦都係感受好深，佢今日出席活動時就向《香港01》表示：「我唔敢睇，都係人哋講畀我聽，我哋可以做嘅就係參與多啲活動宣揚多啲正面訊息，等香港個氣氛好啲，可能係因為香港環境比較細、生活壓力比較大，令大家負面情緒比較多，引致好多呢啲悲情發生。如果佢係好人好者，佢絕對唔會掉自己隻狗落街。有情緒係應該用其他方面處理，唔應該傷害手無寸鐵嘅人、動物。」

Jessica喺訪問時亦表示自己認為「動物警察」應該早日成立，而其實社會各界亦慢慢正視愛護動物問題，好似依家多咗人養唐狗。至於殺狗殺貓係唔係應該提高刑罰，Jessica就咁講：「要視乎點解個人要做呢件事，其實應該同殺人嘅判決差唔多，因為始終都係生命，佢哋係唔識講嘢，但其實佢哋都係有感受，有人覺得動物好多，冇咗隻冇所謂，但其實人都好多。」殺人最高判終身監禁，殺狗係咪都應該咁？佢就咁睇嘅：「如果嗰個人係鍾意為其他人、動物帶來痛苦而做呢啲事，係真係要重判，但去到咩地步，就要慢慢商討。」