宣萱孖古天樂拍電影 ：希望大家會見不到一樣的宣萱
撰文：鄺鈺瑩
出版：更新：
《尋秦記》電影版落實開拍，主角繼續有古天樂、林峯同宣萱，劇迷的集體回憶即時返晒嚟。對於電影版的進度，宣萱呢日出席《微博之夜2017 - 香港站頒獎禮》時，就話：「5月我先會拍一套《犯罪現場》，是關於殺人的，同古仔、張繼聰合作，今次終於唔再做人質。」
咁大家都好期待的《尋秦記》電影版呢？宣萱透露暫定係9月，但目前佢連劇本都未收到，更表示導演暫時都未搵過佢傾。「自己都好期待，因為大家咁多年無合作，以前大家都係TVB經理人，兜兜轉轉咁多年又變番同一公司，工作上，我哋係一個聚會，對觀眾來說亦都係好好，因為好難得我哋三個再合作。」
簽約古天樂公司後，宣萱直言想在電影上有更多的嘗試。「以前自己在電影的戲份不重，但而家唔同，加上我係對自己有要求的人，會想用唔同的方法去演繹，電影同電視劇的表達方法不同，前者會更細膩一點，觀眾要求亦有所不同，人哋畀得錢入場，你都要交到嘢，希望大家接下來會見不到一樣的宣萱。」
宣萱在《微博之夜2017》上憑《不懂撒嬌的女人》得到給力女主角獎，另外又同林文龍得到給力熒幕組合獎，宣萱接訪訪問時，話自己每日都會loop微博，亦都有睇粉絲的留言，但她表示自己一定唔會係手機不離身的人。「我可以幾個小時唔睇電話都得，特別係同朋友見面時，大家約得出來食飯當然係想傾偈，之前有朋友係咁覆email，好唔專心，咁不如少見啲。」