巨聲幫陳康健患罕見疾病　太虛弱拍唔到劇：我食飯都會暈

《超級巨聲》出身嘅陳康健雖然唱功了得，但大家認識佢、見到佢都係因為佢不時喺TVB嘅劇集裡面亮相，並唔係因為佢喺舞台上嘅表現。多得側田喺網上貼出一條佢睇陳康健玩Busking，睇到忍唔住要Jam歌唱兩咀嘅片段，等大家都諗返起陳康健其實真係識唱歌。

陳康健赤柱曬住玩Busking　感激側田Po片：等人知我仲努力緊

陳康健赤柱玩Busking唱側田名曲　原唱都忍唔住畀Like Jam兩咀

不過諗深一層，陳康健最近真係比較少機會喺TVB度同觀眾見面，之前除咗喺《誇世代》客串過一兩幕，對上一次比較多戲份嘅劇已經係講緊差唔多兩年前拍嘅《我瞞結婚了》。問佢點解會咁？佢接受《香港01》訪問時就話其實係因為自己患上咗一種罕見嘅免疫系統疾病。根據一啲網上資料，呢個病大約係十萬至五十萬人裡面至有一個人「中招」，身體好多器官例如胰臟、膽囊、腎臟、肺部、淋巴結都會受到免疫系統攻擊而纖維化或增生腫瘤，致使有關器官功能受損，情況可以好嚴重。

陳康健就話呢個病好影響到佢之前嘅拍攝工作：「我係完全拍唔到長劇，最多只可以客串，之前我身體真係好差，西醫亦都醫唔到呢個病，只能夠靠調理身體等自己情況好啲，希望日後可以拍返劇。」提到之前佢拍攝《我瞞結婚了》時好似冇咩嘢咁，但佢就話其實當時已經好唔妥：「其實嗰時我好嚴重，食飯都會頭暈，當時仲未知係咩病，但覺得個人好唔妥，睇醫生搵病因搵咗好幾年，依家好返好多。呢個病係睇樣睇唔到，而病嘅過程令自己成長咗好多，因為好多人都唔知你病，唔知你咁辛苦。」

雖然少咗拍劇，但陳康健就話唔會因為咁而喺生活上有好大問題：「因為好多人好支持我，我有學生跟我學唱歌，做Busking時亦都會收到打賞。」講到佢之前喺網上好輕力咁提過自己已經同女朋友分手，問會唔會同佢不幸患病有關，佢就答得好淡然：「唔關事，我哋係和平分手嘅。」喺度都希望陳康健佢可以好快好似佢個名咁健健康康，早日康復，喺大家面前唱多啲歌、拍多啲劇。