【1+1的深情】楊證樺沈可欣樂做甘草夫妻　補求婚令太太感動爆喊

當兩個人愛到攜手邁向人生新階段，追求嘅唔再係驚天動地，有時平淡過每一日，見到對方已經非常幸福。楊證樺沈可欣兩夫婦喺TVB演戲多年，相知相許十數載，育有一個囝囝，依家嘅生活一切以小朋友行先。日前佢地現身由田蕊妮主持嘅《1+1的深情》擔任嘉賓時，楊證樺趁機會CALL齊好朋友，為太太送上驚喜：「喺嚟緊嘅日子我會用盡我嘅能力，守謢你保護你愛護你。」邊個話婚後一定浪漫不再？

楊證樺沈可欣演聾啞日練10小時　冇諗過放棄：演員係我終身職業

節目入面楊證樺笑言以前曾經有三十幾個女朋友，當佢遇上沈可欣時，就知道佢係對的人，要好好珍惜：「阿沈性格好師奶仔，因為我結婚前係拚命向前衝嘅人，佢會行半個鐘為咗一包尿片平一蚊，呢啲咪好老婆囉。」兩公婆曾經喺《踩過界》其中一個單元，飾演一對聾啞夫妻，現實生活中全副心機放喺囝囝身上，佢地憶述小朋友病重時仲猶有如悸：「囝囝歲半時試過發燒發成日，揸車去醫院時老婆喺後座大嗌 阿仔抽筋呀，擰轉面一望太太已經喊晒，囝囝仲無咗知覺，好驚佢就咁離開。」

當年佢地先註冊再補擺喜酒，沈可欣喺節目中笑住投訴開席前兄弟團全部已經飲醉，求婚亦無咩儀式，只係睇睇下電視好似閒聊一樣：「不如結婚囉﹗」原來楊證樺一直記住呢個遺憾，好希望為太太補上一個隆重嘅求婚儀式，趁住呢次節目佢終於實行啦﹗搵齊當年兄弟姐妹團，BOOK埋沈可欣曾經講過希望坐嘅直昇機，夾埋節目組台前幕後，為太太送上驚喜。

【情人節】袁文傑拍拖七年霸氣第一次送花　女友張潔蓮感動到喊
【黃昏戀】吳香倫幸福含淚拍婚照　陳榮峻：繼續做你嘅人肉鬧鐘

田蕊妮載住蒙眼嘅沈可欣去到直昇機場，重見天日一刻，見到楊證樺著上全套白馬王子西裝，拎住鮮花同戒指下跪講出愛的宣言：「老婆，雖然我地結咗婚有咗小朋友，我地註冊、補擺喜酒，但當中有啲過程miss咗，miss咗一個隆重嘅求婚儀式。今日，我帶咗你最好嘅姐妹，我最好嘅兄弟一齊過嚟，同埋我地幻想過嘅求婚儀式，直昇機。喺嚟緊嘅日子我會用盡我嘅能力，守謢你保護你愛護你同囝囝。」

每個女仔都渴望可以喺家人好友見証下，將下半生交託俾至愛，見到老公婚後依舊肯為自己花心機時間，去籌備咁大型嘅驚喜，沈可欣嘅眼淚早已經奪眶而出：「我亂講架咋，真係有直昇機。我覺得最surprise係你點解可以搵晒佢地嚟架﹗」兩個人情深一吻，踏上直昇機欣賞最美嘅風景。雖然佢地喺戲入面經常飾演配角，但喺對方心目中，已經係最無可取替、生命中最重要嘅主角。