【黃昏戀】吳香倫幸福含淚拍婚照 陳榮峻：繼續做你嘅人肉鬧鐘
一對情侶能夠攜手走進婚姻，除咗要相愛，其實仲面對住重重困難，年輕人可能面對金錢住屋問題，上咗年紀嘅戀人一樣面對雙方家人嘅壓力。由田蕊妮主持嘅《1+1的深情》，最新一集搵來陳榮峻吳香倫擔任嘉賓，仲搵來陳榮峻囝囝以及吳媽媽驚喜現身，令呢對準新人感動落淚。
2017年12月8日TVB盆菜宴上，62歲嘅金牌綠葉陳榮峻當住2000人面前，下跪向拍拖3年，現年57歲嘅女友吳香倫求婚。呢段黃昏戀能夠開花結果令唔少人都相當感動。節目中回想起佢地第一次見面，原來係2011年劇集《怒火街頭》中飾演根叔根嬸，田蕊妮取出電腦播放當年嘅片段：「你一定要講真話，我地先可以繼續做到夫妻。」吳香倫喺戲中嘅呢段對白，就好似佢兩個真實寫照一樣。
62歲金牌綠葉陳榮峻向吳香倫求婚 2000人見證：好希望佢能夠開心62歲金牌綠葉陳榮峻與吳香倫相戀 黃昏戀好pure：想畀個名份佢
佢地兩個嘅相處，就好似學生puppy love一樣，陳榮峻會整蠱對方話係吳香倫做主動約佢去唱K，田蕊妮問到底點樣正式喺埋一齊時，又會話：「做戲都有做啦，過馬路借頭借路拖手仔，無俾人Fing開咪即係接受咗囉。」節目中搵嚟幫手策劃求婚嘅黃翠如，原來佢成日都向陳榮峻施加壓力，叫佢快啲向Helen求婚，「我呢啲老嘢求咩婚呀？」「你唔求婚鬼嫁你呀？咁你想同佢一世嗰個想你求婚呀嘛。」結果就成就出盆菜宴下跪一幕。
人生匆匆數十載，能夠去到臨近退休年齡覓得真愛實在唔容易。節目中陳榮峻同囝囝阿聰一齊接受訪問，講到當日展開追求前，陳榮峻拎住幅相問囝囝意見，阿聰坦言當時有點嚇親：「嗰下打個突好愕然，媽咪走左唔係好耐，但之後諗返其實都走咗三四年，自己都成日諗爸爸係咪應該搵返個伴，妹妹曾經私下話感覺上好似對媽媽不忠，但我就覺得媽咪人都走咗，佢都會想爸爸開心。」
其後阿聰更親自向吳香倫道謝:「媽媽剛走咗嗰段時間爸爸真係好崩潰，甚至曾經諗過自殺，所以多謝你，多謝你救返佢，呢件事真係衷心多謝你，陪伴佢行下半生。」田蕊妮亦讀出陳榮峻囡囡嘅親筆信，能夠得到家人祝福，令陳榮峻吳香倫都感動落淚。