【任噏亂評‧VR驅魔人】有人情味就夠？王貽興劉翁犯咗新導演通病
電訊魔童王維基放棄繼續申請電視牌照，雖然可以話係意料中事，但呢件事對一班仍然心愛港產劇集、電視節目嘅人嚟講絕對唔係一件好事，最起碼咁樣係意味住再冇巨人可以撼動到另一個巨人。不過，仍然有一班人唔相信命運，仲覺得有啲嘢係值得做、應該做，就好似王貽興、劉翁（Sunny）兩個咁，最近佢哋兩個就自編自導自演咗一連廿集嘅ViuTV新劇《VR驅魔人》，過去嗰兩晚就已經播咗兩集。
喺呢套號稱「可能係史上最多串星」嘅劇集裡面，貽興同Sunny就飾演返自己，做一對四圍撲水諗住開港產恐怖片嘅好兄弟，但一班老闆淨係對「VR驅魔」呢件事有興趣，所以佢哋兩個就發現呢件事其實有商機，然後就周圍搵人戴呢個VR裝置，以幫人捉鬼嘅名義呃人錢，但中途卻誤打唔撞咁幫咗好多人解開心結，而頭兩集佢哋就先後向飾演Sunny舅父嘅葛民輝同埋飾演妓女嘅鄧月平（Larine）埋手。
聽落就好似幾吸引、好有港式人情味咁，但實際上係唔係咁嘅一回事？齋睇頭兩集就真係爭少少喇，特別係第一集裡面存在住好多沙石，有好多方面都可以做得更加好。我好明白呢個故事裡面有好多嘢都好值得交代同舖陳，但係作為一個創作人亦都要識揀當中有邊樣嘢係最值得講，唔應該太過貪心，如果唔係就會因為樣樣嘢都講而搞到成件事都到喉唔到肺。
最明顯嘅例子就係喺第一集裡面，飾演貽興婆婆嘅余慕蓮話貽興因為拍咗《謎》而畀人笑足咁多年，而貽興就應承余慕蓮會畀心機搵錢等佢可以住大屋咁。其實呢一幕係第一集最好睇嘅一幕，因為貽興可以話係完全真情流露，更透過呢一幕同現實已經離世嘅婆婆隔空對話，好可惜呢場戲對於成集搞VR見鬼、搵葛民輝做白老鼠嘅劇情係毫無幫助，硬生生加插咗呢一部份，成件事有啲突兀之餘仲走走哋Tone。如果真係好想講呢一Part，就應該獨立用一集嘅時間去發展呢條線。
另一樣嘢亦都係好嚴重、好影響到第一集嘅觀賞感受，就係貽興、Sunny花咗唔少嘅時間同篇幅去自己抽自己水。對於認識佢哋經歷嘅人嚟講，呢啲真係一兩句就已經好足夠；對於唔清楚佢哋背景嘅觀眾嚟講，佢哋更加係想睇套劇嘅劇情本身。不過，上面講過嘅情況喺第二集已經改善咗好多，最值得一讚嘅係林兆霞（即係《志明與春嬌》系列嘅Brenda）嘅亮相極其恰到好處，成件事嘅搞笑程度升咗幾個Level，雖然之後Sunny變咗著殭屍衫嚇人好冇頭冇尾。
到底係咩因素導致成套劇硬係爭啲咁？其中一個原因一定係貽興同Sunny都當正今次《VR驅魔人》係最後一次咁做，可能就係因為咁，所以就好想將可以擺到嘅嘢都盡量放落套劇裡面，喺修剪一啲旁枝末節上變得冇咁謹慎，依呢個問題經常喺一啲新晉導演嘅首作裡面搵到。第二個原因，可能係呢套劇實在有太多藝人幫手客串，如果唔畀返適當嘅播出份量佢哋好似對唔住佢哋咁，最後就搞到多咗啲可以刪減嘅畫面。其實外在框架結構都可以係一個原因，始終喺不足半個鐘嘅時間裡面，交代要交代嘅嘢係一件唔容易嘅事。
雖然好似踩得好盡咁，但其實大家都好應該繼續支持呢套作品，點解？就係因為呢套劇有一份屬於香港人獨有嘅人情味，雖然兩個主角都係市儈底，但你會喺佢哋身上搵得到香港人應該有嘅勇氣同埋良知，就好似即使貽興好驚鬼，都鼓起勇氣衝入Larine「開工」嗰間房，幫佢拎走佢死咗嘅男友留低畀佢嘅波鞋咁。對於有Heart嘅人，佢哋需要嘅係支持，隨住第二集嘅處理手法變得成熟同爽快，相信之後嘅集數都會愈來愈好睇，畀次機會佢哋兩個，亦係畀次機會ViuTV，同時都係畀次機會自己。
想睇更多評論？即Click↓