【任噏亂評】如果周杰倫連十首歌都唱唔足 場騷仲值唔值得睇？
周杰倫演唱會近日在香港舉行了同一系列《地表最強》的第二次巡迴，這個系列的演唱會其實在上年的1月已經在香港舉行過，由於反應好所以決定再開第二階段。甫一開場大家便被舞台的效果所吸引，的確這個舞台是做得相當華麗，在周董出面後唱出英雄和雙截棍兩首快歌，在唱後者的時候更連續爆發幾次煙花，確係幾轟動。
正當以為場騷一直都會咁好睇，原來錯的真不了。在之後的幾首情歌，周董明顯還未開聲，唱快歌要快唱的時候，更是完全不入咪，基乎聽唔到佢唱咩。都唔緊要，諗住等佢唱唱吓開咗聲情況會愈來愈好，佢真係開到聲，的確係唱得好聽，但另一個問題就嚟喇，佢係開咗聲唱到，但係成日都唔係自己唱。點樣唔係自己唱？周不時就遞支咪俾觀眾一齊唱，間中一次其實唔係問題，但佢係時常發生，我明明係想聽周董唱歌，唔係想聽全場大合唱呀！
周董一直以來都十分栽培後輩，相信大家都好認同，彈頭、Gary楊瑞代及小麥等等都是大家聽慣的名字。其實捧新人真係無問題，但真係唔好將佢哋當咗係演唱會嘅重點人物，仲好記得小麥solo唱歌，成個場立即開始流動，大家去廁所嘅去廁場，出場外食煙嘅食煙，個場面幾咁齊心幾咁震撼，估唔到周杰倫嘅演唱會都有咁大個廁所位。仲有三首周董愛情經典歌《楓》、《退後》和《擱淺》一律比晒彈頭唱，唔係話佢唱得唔好聽，但我真係想聽由周董口中唱返自己嘅經典歌。講起經典歌，之後仲有一part係唱一連串嘅愛情串燒歌，竟然係搵埋班兄弟五個人大合唱，周董把聲幾乎聽唔到。
【任噏亂評】TVB十大25歲或以下潛質女星 年齡最細只有20歲
【三個女人一個因‧任噏亂評】高層未信任黃智雯 收視成平反理據
基本上成個演唱會，撇開遞咪同合唱，周董究竟有無完整唱晒十首歌呢？好值得懷疑。咁我俾錢入場聽一位歌手，而佢真真正正唱嘅原來只係得咁少，又值唔值得呢？呢個問題每人心中都會有一個答案，可以話俾你聽，對於一個被周杰倫歌曲陪住長大嘅人，係絕對值得！每個人青春時期經歷愛情，都一定會聽過周氏情歌，無論你每一個愛情階段都能夠在周董的歌曲中找得到，是多麼的刻骨銘心。有幾多個人分手時會聽《回到過去》；有幾多人甜蜜時會聽《甜甜的》；有幾多人遺憾時會聽《開不了口》，周杰倫的歌陪住呢代人渡過咗佢哋嘅青春，即使佢以後一首都唱唔到，一樣會俾錢入去聽佢嘅歌，呢張演唱會門票係用嚟買回憶。