【六十分鐘時事雜誌】殺人放火金腰帶？　坐德國監好過住香港劏房

做人真係唔好同人比較，因為比較之後得出嚟嘅結果往往都會令到我哋灰到喊唔出。最近美國節目《六十分鐘時事雜誌》（60 Minutes）就播出「Behind Bars」（鐵窗之後）呢個特輯，而呢一集亦有喺明珠台播出，其中一個話題就係講德國監獄，睇完之後真係有啲覺得喺德國坐監好過喺香港幫地產商供一世樓。

節目裏面有一位囚犯叫約格梅伯克（Joerg Muehlbach），因為運毒同藏械而入獄嘅佢就坐監坐得好歎，佢係住喺一間好似大學宿舍單人房嘅獨立囚室，裏面嘅生活設備一應俱全之餘仲可以打機，基本上真係可以足不出戶，簡直係宅男嘅理想生活。不過，佢閒時都會「出街」掟下飛鏢、打下排球，又或者參加繪畫班、陶藝班。而另一個囚犯叫貝德約根（Bernd Junge），殺過人嘅佢坐監都坐得好有「Work-life Balance」，到星期六日就可以出去監獄同屋企人共聚天倫，過下寫意人生。至於點解可以咁歎？原因係德國等歐洲國家，唔着重懲罰犯過事嘅人，而係想佢哋之後可以變返個正常人，而有75%被判無期徒刑嘅囚犯，坐夠廿年或以下就可以保釋。

仲有一位囚犯叫基斯譚拿（Chris Templiner），佢喺節目裏面淨係肯講自己犯過「非常嚴重嘅罪行」，估計都離唔開殺人放火，而相關官員亦覺得佢仲係好危險，所以坐咗廿年監都未知幾時可以假釋。主持人問佢係咪預計到自己會喺監倉到終老，佢就答「或者係」。至於佢個監倉係點？可以話係成間Apartment咁，對比起香港差唔多有21萬人住嘅劏房，真係好好多。

其實間唔中都會見到人喺啲討論區翻兜歐洲啲監獄有幾好住，就好似挪威某啲監獄成間酒店咁，伴侶嚟探監時仲會安排間兩人房畀佢哋「短聚」。好多嘢都係睇完就算，唔好羨慕咁多，李嘉誠退咗休唔代表李澤鉅話畀你知聽日唔使返工，所以下個月奇妙電視播映張可頤、劉美君套《來生不做香港人》真係好應景。