奇妙電視播港視劇　《來生不做香港人》4月中「再」出街

有「魔童」之稱嘅王維基曾經大搞香港電視網絡（HKTV），落重本拍攝《選戰》、《警界線》、《導火新聞線》和《惡毒老人同盟》等多套劇集，令好多觀眾都大讚題材新鮮又拍得好睇，但好可惜HKTV申請極免費電視牌照都申請唔到，搞到被逼停止製作電視節目兼轉型做電子商貿。之前HKTV一口氣放哂拍落嘅劇集上YouTube畀香港觀眾睇，但之後又轉做海外觀眾先睇得，搞到好多人想睇都睇唔到。唔緊要，因為HKTV其中一套劇《來生不做香港人》四月十七日就喺奇妙77台播放。

其實《來生不做香港人》係幾好睇，唔單止有張可頤同劉美君做女主角，仲有「舞台劇王子」潘燦良、曾偉權、龔慈恩和艾威等人腳，再加上本身個故事係圍繞住內地同香港嘅價值同文化差異，就算事隔三年再重溫都唔覺得老土。繼之前搵咗王喜做創作總監，奇妙電視依家又打算播HKTV嘅劇，似乎好似真係準備有所搞作咁。

對於播HKTV嘅劇，奇妙電視就咁回覆嘅：「奇妙電視將於四月中旬開始播放香港電視之製作，讓觀眾於免費頻道欣賞有關節目。奇妙電視致力為觀眾搜羅高質素節目。作為本港免費電視，奇妙電視鼓勵業界發展，讓觀眾欣賞多元化精彩節目，提供免費娛樂真‧選擇。」至於其他仲會唔會有其他HKTV劇等住播出？奇妙電視方面就冇直接答，淨係話仲會有其他節目製作播出。