霍金點止物理學家咁簡單　仲係宇宙級搖滾巨星

享譽全球嘅天才級物理學家霍金（Stephen Hawking）今日逝世，享年76歲。佢除咗喺學術上貢獻良多，更多次在影視節目上亮相，主持過《霍金天才教室》、《霍金的宇宙大探索》等，可以話係半個藝人。其實佢喺演藝路上都有過好多唔同嘅搞作，你話佢係「搖滾巨星」都絕不為過。

點解？因為霍金曾經喺2014年時同英國老牌樂隊Pink Floyd合作過《Talkin’ Hawkin》，喺一段激昂音樂裏面，用佢把充滿Cyber Punk風格嘅招牌電腦語音聲讀出幾句句子，大意就係話人類就係靠對話去將不可能嘅事成為可能，而最後一句「All we need to do is make sure we keep talking（我哋所有需要做嘅嘢就係保持住對話）」更是愈嗒愈有味。

而霍金亦都好識拎自己患肌萎縮性脊髓側索硬化症（ALS，漸凍人症）嚟講笑，之前他接受訪問時就曾經話過自己好想參與007系列嘅拍攝，話自己好適合做電影裏面嘅壞人，因為成件事同佢坐緊嘅輪椅同用緊嘅電腦語音聲好夾。