【專訪】余迪偉解構最難處理關係：LGBT唔係咩大事情

余迪偉(又名迪奶) 呢個名大家聽唔少，聲音更是每日也能在收音機聽到，陪伴著每位打工仔度過難捱的辦工時間。與他會面，其實就像打去電台跟主持聊天一樣，你有什麼不明白、有什麼好奇，他就像私人諮詢師一樣，秒速解答你的問題，你花一整天也想不通的問題，他好像想也不用想的便與你聊起來。傾落你可能更會發現，他可能比你的朋友更多話題，可說是「乜都吹得」，毫無保留將自己的生活點滴及經驗與你分享。即將於4月開一連3場的個人劇場《一支弓》，比起平常賣笑點的棟篤笑，迪偉那種帶點Bitchy的演繹同樣令人期待。
攝影：陳順禎
Hair：Hillnex Lee@The Attic
Make up：Echo Wong
Wardrobe：Wagamamaplayground
Accessories：red dot optic
Location：The Attic

關於「一支公」

雖然今次《一支弓》這台獨腳戲是以迪偉的成長經歷取材，不過講起「一支公」這個話題，其實總與香港離不開。現代人適婚年齡越推越遲，更出現不少「單身貴族」去到三十多四十歲，仍然嚮往著一個人的生活。一向講嘢唔戴頭盔的迪偉深明這個狀況：「其實現代人比較忠於自己，個個都係性格巨星，其實無問題㗎，你選擇自己生活條路係活得開心就得。我阿爸阿媽嗰一代可能講緊仲係十幾歲就要盲婚啞嫁，你老公老婆咩樣都唔知就結婚，啱唔啱好唔好，無人知㗎，組織到家庭、生活到落去就得㗎啦。但去到呢個年代，自由掛帥，你鐘意行條咩路，只要你行得到咪得囉，無人左右到你，做返性格巨星其實係無問題㗎，你覺得開心咪得囉。」

LGBT比異性關係更進取？

提起迪偉，不知怎地總是跟LGBT(女同性戀者、男同性戀者、雙性戀者與跨性別者)的話題掛勾。筆者身邊也有不少這類型的朋友，而更令筆者好奇的，是同性戀者在追求伴侶方面，也顯得比異性戀者來得主動、進取，甚至是用心去找尋人生中的伴侶，講到這裡，迪偉直言不同意：「我哋先唔好用LGBT去睇呢個問題，單計我身邊，Single而想有伴侶嘅人，女仔佔咗8成，男仔2成，兩邊都成日叫我介紹人比佢哋識、約吓食飯咁，而呢條龍始終都係女仔多啲。去到LGBT嗰邊，其實個情況係一樣，首先我覺得LGBT呢個群眾本來已經係大膽啲，如果唔係佢哋都應該仲喺個衣櫃入面唔敢出嚟，而夠膽行出嚟嗰啲，佢哋真係大膽啲咁話比大家聽，我Single，我一支公，我想拍Partner，所以觀感上我哋會覺得佢哋比較主動啲。」

玩App影響現代愛情觀？

既然講開愛情，其實影響現代愛情觀的，最大原因還是要說到網絡及App的盛行。現代交友App，說得好聽是交友，直白點說，不少人也是用來「搵食」，不是揸的士那種，而尋找伴侶解悶慰寂寥那種。而男男女女在App上搵食，需求總是來得很直接，可能是短期的性關係，也可能是搵長期飯票，但要找到有commitment的伴侶，似乎難過中六合彩。迪偉表示：「呢個世界係物極必反，記得呢啲App啱啱面世，我啲開酒吧嘅朋友話無晒生意，尤其頭半年，係可以由100人跌到20人次，因為啲人安坐家中搖兩搖就有著落。再到而家，人流返晒去酒吧，鐘意見到真人多啲，因為啲人可能喺App度傾咗半年約出街，嘩有冇搞錯，原來係伏嚟嘅，更加唔好講畀人呃錢嗰啲。所以呢個世界好得意，大家會搵到適合自己嘅方向，唔好嘅就會返轉頭。」

再聊下去，讓迪偉回復節目主持的身份，大家談到一個情景題。「當我是一個30出頭也沒什麼戀愛經驗的毒男，到底迪偉會建議我應該落酒吧認識一下朋友，還是在App裡練習一下Pick Up技巧？」他立刻反對：「如果無乜經驗，呢兩樣嘢都唔應該試，你未讀過幼稚園、小學、中學，點讀大學呢？你連最基本同人接觸嘅技巧都冇，去酒吧、玩App隨時令你身敗名裂。要起步，應該係take一啲興趣班先，認識下唔同嘅人，擴闊自己嘅世界觀、自己嘅圈子。」

他舉了一個例子：「曾經認識一位40多歲的女士，結婚20年，但去到40頭的時候，老公突然同佢離婚，佢又冇仔女，孤單底下佢就走上網搵伴侶。一路搵一路搵，終於畀佢搵到個外國人好愛好愛佢，佢又飛去外國搵個男人，個男人又飛嚟香港搵佢，諗住好開心啦。點知，原來呢個男人兩年半以來，一共呃咗佢180萬，其實周街都係呢啲故事。」

最難處理的關係

迪偉由903的《一八七二遊花園》到現時Viutv的《晚吹》，曾與不少聽眾嘉賓傾計分享個案。但原來在迪偉心目中，最難搞的從來不是愛情，而是家人的關係。迪偉又再分享：「好多打嚟講家庭問題嘅電話，呢一刻你講完個解決方法畀佢聽，轉個頭兩三個月佢又打電話嚟，家家有本難唸的經，雖然我哋盡量都想幫，其實你真係幫佢唔到。

例如曾經有一個媽咪，覺得自己個女好反叛，又紋身、又唔知個女識啲咩朋友等等，後來機緣之下，我認識到佢個女。原來個女係Lesbian，佢自己覺得同阿媽好唔夾，成日都想離家出走，但經濟又support唔到自己，結果佢最大嘅問題，原來係好想話畀阿媽聽自己係鐘意女仔，同屋企人come out。

我問佢：『你阿媽知唔知你最friend嘅係咩人？知唔知你返緊咩工？』原來佢阿媽乜都唔知，我覺得你咩都唔畀阿媽知，咁大隔閡，點解你會覺得自己係Lesbian呢件事係一個咁大嘅題目，要同你阿媽講呢？你阿媽連最基本你做咩工都唔知，你有個女朋友有乜咁巴閉，要逼你阿媽知呢？出櫃唔係一件好巴閉嘅大事，對你阿媽嚟講，佢最大嘅問題係想搵個方法去愛個女都搵唔到呀，你同佢講出櫃又有咩意思呢？你想同你阿媽關係好，唔係帶個女朋友返屋企話畀佢聽你係Lesbian，咁樣諗好自私。你想同阿媽關係好，係應該做返一個女應該做嘅嘢，大家知道大家嘅生活係點先，係Lesbian有咩咁Big Deal呀？」你可能不會盡同他的說法，也並不特別喜歡他平時在節目中那種Bitchy的演繹，但老實說，有些事情上，你的確反駁不了他。