【一路向西伯利亞】黎學勤係香港水球隊代表　玩埋賽車做城城隊友

ViuTV播映的《一路向西利伯利亞》已經來到尾聲的最後一個星期。相信觀眾都會一邊睇一邊葡萄節2位男神主持黎學勤（Jeffery）與莫竣名﹙Louis﹚，可以「旅行為名，溝女為實」周遊列國識女仔，搵美女當導遊。當中2人更要進行比賽以求贏得異國美女的歡心。不過，據非正式統計顯示，睇節目以女性為主，其中又以黎學勤（Jeffery）較多人討論。點解？因為最近Jeffery除了出現在ViuTV節目上，更有Trivago廣告在TVB日播夜播，真係聽到聲都認得個樣。

講起《一路向西利伯利亞》呢個節目，其實唔少睇過嘅網民都提過一件事：「Jeffery同Louis 2個男仔去旅行真係有少少hehe。」估唔到，連主角之一嘅Jeffery都好認同呢個講法。「咩少少hehe吖？好hehe添吖呢件事。因為我哋拍節目唔止拍女仔，喺西伯利亞鐵路好多時候都係我同Louis一齊瞓。」

黎學勤（Jeffery），可能大家只係記得佢拍過廣告，做過節目。再深入啲了解，原來他入行前仲做過電腦保安、游泳教練、讀過IVE、又讀過公開大學。興趣運動涉獵更廣，16歲的時候是香港水球隊，做model入行之後更接觸泰拳，又曾經與郭富城同一間賽車隊。黎學勤：「佢有個叫做FRD嘅車隊，最初代就係關邵昌先生。我都係喺嗰度學formula嘅。」

當初他選擇入行，其實原來都有段故仔。黎學勤說：「我本身係教游水嘅。之前係因為媽咪唔舒服，病咗。所以我未讀完書畢業就出咗嚟返工。教教下游水就有朋友介紹，不如就上去casting啦，所以我就上咗宜家經理人公司。當時公司就話：『不如簽你做model啦。』但係嗰時我又唔係咁想住，我又想做下freelance先。後尾拍咗幾個廣告之後，我先自己敲返門，話我想做返model，可唔可簽我吖？」宜家有得睇《一路向西利伯利亞》，其實都要多謝當時位介紹佢入行嘅朋友。