澳牛謝東閔要求合照　麥明詩受寵若驚：聽日太陽應該會西邊升起

香港有一間茶餐廳，出名要快！食客坐低落單如果遲疑三秒，就會被伙計即場嫌棄太慢；所以要幫襯，不少人會在門口揀定食咩餐，入到去秒速嗌餐，咁就免受口舌之苦，相信大家都知道係咪餐廳，冇錯就係澳牛（澳洲牛奶公司）喇。

不過，凡事都有例外，尤其是靚女。話說麥明詩做完嘢諗住食個下午茶，去到嘅時候，有伙計就有認得佢，仲要求自拍合照。第一次在澳牛有如此特別待遇，當然要擺上facebook打卡，麥明詩勁開心咁話：「我受寵若驚，搞到諗唔到想食炒蛋定煎蛋。聽日太陽應該會西邊升起。」臨尾仲嚟多個#澳牛奇遇記hashtag。

麥明詩事後接受《香港01》訪問表示，伙記哥哥好nice：「超好服務呀真係！我未食完個通粉同蛋，佢就已經問我落埋嘢飲。你知以前嘅話，未食完就嗌嘢飲，係會畀佢哋話㗎嘛！」網民見到張相，好搞笑地封伙記哥哥為「澳牛謝東閔」，講起澳牛雖然出名好趕，但係有啲細節都好有義氣嘅：「佢哋見到大肚婆會好待遇啲，都唔係衰得晒㗎！」都有網民非常羨慕麥明詩，留言：「係見到靚女同港姐先會咁好！一般人係唔會有咁嘅待遇！」所以各位朋友，平時去澳牛食嘢，都係門口揀定算喇！