【兵仔講兵法】宅男打「芒亨」發圍　唔使靚仔有錢都追到女仔

近日打機界熱話《Monster Hunter World》，掀起了一片斬龍熱潮，而對於宅男來說，打芒亨不但過足機癮，最重要是終於可以展示到自己最強一面，尤其是呢隻Game需要組隊一齊玩，而且不乏女仔玩家，打機追女仔一舉兩得。

以往宅男沉迷打機，總被歸類為唔夠上進，浪費時間，要追女仔真係難過登天，但自從最新版本芒亨推出後，大家可以盡展自己所長，首先現實嘅你唔夠潮、唔夠In，無問題，幫個角色整返個靚仔樣，鍾意似劉華又得，似TFBoys都無難度，話晒出來行走江湖，Image都幾緊要，起碼第一印象唔會差先。

老實講虛擬世界雌雄莫辨，以為對方角色係女仔，真身可以係麻甩佬，而芒亨嘅好處就係要戴咪先可以對話，起碼同你組隊嘅女仔，唔會另有性別先啦。至於有玩家用變聲器來打機，遇上這種擺明玩嘢嘅人，都只能怨句唔好彩，等於大家拍拖，都唔一定遇到好女仔，但總叫有個識到女仔嘅機會。

相關文章：

【兵仔講兵法】女神寧願揀運輸兵　儲首期買樓等於孭廿年債？​

【兵仔講兵法】追到女神就好幸福？　之後相處先知味道

【兵仔講兵法】情場唔止蝕只因唔忿氣　跳船再入貨先係王道

以前上網打機，要玩得勁課金就唔少得，即是越有錢玩得越勁，但芒亨就真係要靠自己實力，材料裝備武器全部要慢慢打慢慢儲，有血有汗先可以升呢，仲有斬龍嘅技巧都要苦練，同女玩家互相研究，感情肯定可以大躍進。最後一個超級秘技，非必要時都唔好咁做，就係靜靜雞買個高手帳號，孭住一身高端裝備去屠龍，肯定引來不少羨慕目光，仲可以係女玩家面前威威，不過咁做就失去咗玩芒亨嘅樂趣啦。