【萬千星輝】田蕊妮今年強勢稱后！　分析對手點解唔夠佢鬥

《萬千星輝頒獎禮2017》明晚舉行，各路人馬紛紛準備入閘，當然賽前都出盡法寶為自己或者對手拉票，為對手拉票日日都做得出，俾面俾面，又顯得自己大量。不過為自己拉票其實並不是一件奇怪的事，只要你對自己有信心，為自己拉票絕對係好正常！講緊嘅係田蕊妮，阿田早前在公開活動已經講緊，今年的視后人選就是自己，因為她在《迷》入面的角色的確好有發揮，甚至連自己都好難抽離，所以今年就唔客氣投自己！

講真喎！阿田在《迷》入面的發揮的確好好，由一開頭是一名有理念的記者，去到最後愈來愈成魔，甚至殺人，那種心理變化唔係個個都輕易做得到。之後去到《誇世代》又係類似，由本來一個不得志的藝人，到開始紅，突然乜都無晒，又突然擁有超能力再成魔，不停的起起跌跌，阿田在每個階段都發揮得相當之好。佢自己話將會開始減產，不過今年都叫做有兩套劇擔正做主角，曾經憑《巨輪》拎晒視后和「最受歡迎電視女角色」，也試過在《鬼同你OT》拎「最受歡迎電視女角色」，其實今年好大機會再下一城。

講一下佢嘅對手，李佳芯和唐詩詠都略嫌未夠火喉，講演技未到阿田嘅水準，江美儀演技夠好，但係《親親我好媽》中的發揮未算好大，《誇世代》也只屬配角，《同盟》都係得幾集。宣萱今年算大熱，在大馬頒獎禮亦已經封后，不過她當年同張可頤爭視后，結果只獲得「最受歡迎電視女角色」，未能二度封后，到了今年的演技能否再得到觀眾們的認同呢？在《不懂撒嬌的女人》中飾演一名外表剛強，實質柔弱的女角色，發揮係有嘅，但好似同劇的唐詩詠仲搶鏡過佢。至於已經連拎兩屆視后的胡定欣，今年在《同盟》發揮一般，而且其實好似上年嘅《城寨英雄》，相信複製自己無理由可以拎獎。鮑起靜鮑姐大家都似乎對佢做奸角的印象一般，在《同盟》經常都奸唔起，加上佢已經沒有同無綫合作，應該都無得爭。最後要講係《溏心風暴3》的幾位女主角，岑麗香陪跑，三大長老關菊英、李司棋和米雪，以司棋姐的戲份最能夠爭獎，不過大家睇一個好媽媽的司棋姐已經睇咗好多年，講埋潮語嘅司棋姐反而令佢更加奇怪，演技上當然無得質疑，不過就略微畫蛇添足。

【萬千星輝】20年邊個攞得最多獎？ 有人今年有機打破視帝記錄

【萬千星輝】最強預測！五強名單 TVB夠唔夠膽俾《溏心風暴3》？

【萬千星輝】最強預測．下集！配角飛躍多黑馬 拍檔獎係Do姐農夫

講到底，阿田如果論演技，能夠做她的對手人選並不多，甚至可以講一定係最大熱門，不過頒獎禮，大家都知喇，唔會剩係講演技，仲有好多外在因素嘅！