【萬千星輝】最強預測！五強名單 TVB夠唔夠膽俾《溏心風暴3》？
《萬千星輝頒獎典禮2017》在1月21日便會進行，雖然已經出了初步的入選名陣，不過全部都是大包圍一選，一個獎隨時有成20個候選人，沒有甚麼實際參考性。不過大家都知道，TVB之後將會再有一個五強名單，到時先至真真正正叫做最後直路，既然TVB尚未公佈，我們率先為大家預測一下最後五強花落誰家。
最佳男主角－陳豪 夏雨 王浩信 陳展鵬 馬國明
頭五套年頭劇，基本上都唔使諗爭獎，林文龍在劇中的角色甚至不夠配角王浩信搶鏡。在講中間一堆劇的時候，先講最後兩套重頭台慶劇《溏心風暴3》和《誇世代》，相信總要預留一個位置給這兩套劇，由於張繼聰無份爭，陳豪應該會比歐陽振華更佔先機，始終套劇最搞笑就是他和張繼聰。而《溏3》夏雨相信也會爭贏黃宗澤入五強，憑的當然是輩份。還有三個位置，大台力捧的王浩信佔一位，第一小生陳展鵬佔一位，而礙於觀眾壓力，好評如潮《降魔的》中馬國明也可以搶一個位置。《使徒行者2》周柏豪袁偉豪未夠班，三哥已經在大馬拎了獎，蕭正楠唯有再等一等吧。
最佳女主角－田蕊妮 胡定欣 李佳芯 李司棋 江美儀
頭六位，除了《親親我好媽》屬於比較有回響的年頭劇，其餘都只是陪跑份子，不過作為當家花旦，田蕊妮相信會穩佔一席位，。《不懂撤嬌的女人》宣萱又是在大馬已拎獎，今次香港未必會再有佢，而唐詩詠未夠班，似係爭電視女角色。《同盟》胡定欣備受力捧，預佢一席，鮑姐已完約唔玩頒獎禮，《燦爛的外母》、《雜警奇兵》又係陪跑，《使2》黃翠如未夠實力。所以剩低三個位，會由《誇世代》唯一入選兼備力捧的李佳芯佔一個，另外兩個會落入《溏3》，司棋姐一定會有，但其餘三個戲份並不算突出，會否殺出一個黑馬？最大可能會是《親親我好媽》入面的江美儀。
最受歡迎電視男角色－程日暉 馬季 宋仲基 凌乘風 高子杰
這個獎項和最受歡迎女角色一樣十分難預測，如果TVB今年要搵尊重民意，程日暉（王浩信飾）和馬季（馬國明飾）相信都要入選，而兩套台慶劇，陳豪入選了視帝，但角色唔似可以連爭兩獎，所以今次《誇世代》代表人物會是宋仲基（歐陽振華飾），不過相信佢唔會玩頒獎禮，所以都係入五強陪跑。《溏3》只有凌乘風（黃宗澤飾）有份，五強預佢，還有最後一個位置，《同盟》高子杰（陳展鵬飾）你又係無得唔俾佢爭，所以一定又有佢份。
最受歡迎電視女角色－查向善 戴天恩 貝貝娜 韋以柔 許貝兒
年頭《親親我好媽》備力受捧，查向善（江美儀飾）這個虎媽角色可算有最大功勞，要預佢一席。《踩過界》中的戴天恩（朱千雪飾），雖然戲份並不多，但觀眾卻相當喜歡，相信好大原來是因為朱千雪，唔理咩原因，都要預佢一席。作為《降魔的》中的配角，貝貝娜（劉佩玥飾），即係啤啤，她的角色比起同劇的更為動人，相信可以搶一席位。在《同盟》中，韋以柔（姚子羚飾）的角色發揮也是比專注打鬥場面的胡定欣為大，正路應該由佢入選。至於《誇世代》李佳芯已經入圍視后，今次應該無佢份，《溏3》又係四人爭一個位，香香飾演的許貝兒憑住觀眾緣相信今次可以試下力爭。
【萬千星輝】《降魔的》啤啤終於有份爭獎 劉佩玥今次有無機會？
最佳劇集－《降魔的》 《踩過界》 《同盟》 《溏心風暴3》 《誇世代》
呢個位一定有一個要留給《降魔的》，連馬明都開口想爭呢個獎，無綫無理由唔俾面，亦都是一個俾機會TVB證明自己有聽民意的好方法。《踩過界》亦是另一套風評十分好的劇集，無理由唔預佢一席。至於剩下的三個位置，以今年TVB劇集來說，《親親我好媽》其實劇本相當好，可惜年頭劇兼無大星撐場，未必有機會入選最後五強。相反，《同盟》劇本不過不失，而且粒粒皆星，入圍五強屬正路之選。最後兩個位，大家唔使估，兩頭重頭台慶劇走唔甩。
之後仲會同大家分析其他獎的最後五強名單，敬請留意！