【萬千星輝】台慶頒獎禮加入半民選獎項就叫公平？　唔好咁天真喇

一年一度嘅萬千星輝頒獎典禮又嚟喇，雖然早前已經率先舉行過提名名單記者會，但TVB今日再正式搞多次記者會，即場宣布埋其他的獎項提名。而今次的投票機制分成3個組別，分別是「全民及TVB評委會」、「big big channel用戶及TVB評委會」以及「TVB評委會及全台職藝員」。嘩！3個組別都有TVB評委會，究竟當中比率係點，頒獎禮幕後推手兼TVB電視助理總經理余詠珊就話唔回應，點解咁神秘！

去年台慶頒獎禮只錄得27.6點，成為最低收視的一屆。因為其中有一個投票組別是「評委會組別」，即係由一班無綫高層組成，所以搞到好多人都炮轟無綫是小圈子選舉！而今年頒獎禮應該都可以話係最激烈，點解？Well，因為一套《降魔的》令到本身唔追嘅劇嘅觀眾都煲埋一份，當中飾演「龍貓」嘅何遠東仲被網友以及視后田蕊妮推舉為今年男配角無誤，但TVB係咪真係會聽網友嘅意見呢？入圍男配角獎項嘅仲有何廣沛、張振朗等人，佢地都係TVB經理人約旗下嘅藝員，即係所謂嘅「親生仔」，而何遠東只不過係部頭約藝員，根據過往頒獎禮套路，呢個獎一定係頒比親生仔嘅！

雖然近幾年TVB加入半民選獎項，但觀眾認為演員再好戲仍敵不過潛規則。其實細心一看，今年確實係同去年唔同，因為去年分別有「評委會組別」、「全民及專業投票組別」及「評委會及全台職藝員投票組別」。相比起今年當中有兩個投票組別都係市民可以互動，似乎透明度係高咗。希望今年頒獎禮嘅賽果，係大家都一致認同嘅，btw如果到時出嚟嘅成績係意料之外，畫公仔唔洗畫出腸，明嘅！