【年度奸人大賞】愈喪心病狂觀眾愈buy！ 呢4個奸角最值得攞獎
古語有云：「識揀一定做奸人！」根據非正式統計，幾乎套套劇彈起，都係因為有個奸人做到大家都想掐死佢！不過可惜吖，做得幾好又點，始終頒獎禮唔會有個「奸到出汁獎」畀佢哋，然後一年又過去…佢哋嘅努力就無疾而終。所以！今次《01娛樂》就為大家介紹返2017年4位終極奸人，睇下佢哋做過幾多傷天害理嘅事！
奸人入門級：
《超時空男臣》－張誠（鄭子誠飾）
向來都一副奸樣嘅鄭子誠，你要佢奸，Easy Job喇。不過今次佢喺超時空男臣入面，已經叫做冇咁奸！因為佢只不過係尋仇，時空穿越搵蕭正楠算帳。最正都係佢哋嘅Marvel式對打，又紅又藍都唔知睇緊Star Wars定復仇者聯盟喇…不過好少事啫，最多咪判佢「非法入境罪」、「蓄意傷害他人身體」同埋「毀壞建築物」！
【平安谷】御用奸人鄭子誠演獸醫 同沈卓盈有感情：今次唔算奸人
慢性變奸：
《降魔的》－郭展明（黃子恆飾）
呢位魔警，真係要贈佢一句：「問世間情為何物！」有「魔」嘅出現，直接引發咗佢嘅dark side，所以馬國明追咗佢鍾意嘅人，就要開展殺人行動，開始教唆他人，一連串隊冧馬國明身邊嘅人。去到後期，仲掐死埋最愛嘅人…以為咁樣就可以永遠擁有佢？你只係傻仔嚟㗎咋！判你「教唆他人犯罪」、「公職人員行為失當」、「傷人或對他人身體加以嚴重傷害」同埋「謀殺罪」！
重型奸人：
《乘勝狙撃》－蔣天龍（吳岱融飾）
看到鷲哥…呀唔係，係蔣天龍就一定會估到佢會爆seed喇，除咗指定對白，臭嘟之外，佢喺最後一集仲有大爆發…去婚禮亂槍掃射，然後返屋企隊冧個仔，仲要臨死都要鬧老婆：「我話你係雞啫，你唔使真係當自己係雞嘅」，然後噴血…完！殺人犯入面，都算係反高潮喇，判你謀殺入去坐廿年喇！
【Cult到裂開】吳岱融原來做過導演 「大作」《社團之撚位》票房僅6萬
終極奸人大獎：
《反黑》－招積（張建聲飾）
睇招積一副Joker樣，鷲哥同佢比？根本就係蚊比同牛比！我用例子答你。除咗綁架退休警員、襲警、殺人之外，招積最癲嘅一幕，大家唔會唔記得喇！就係佢將火屎（吳毅將飾）個咀用一針一線縫埋，你以為咁就完？話口未完，招積就擘大口，火屎嘅一口眼球刺身就完成…仲要將眼珠擺上檯好似Web Cam咁望住火屎…唔知有幾多人睇完嘔埋腸呀腎呀出嚟！雖然佢有殺過大佬B，但係呢種慢性折磨…告佢「謀殺」呀！坐到終身監禁都唔夠囉