【降魔的】馬國明未收到通知落實開拍續集：有無我都一樣開心

無綫劇集《降魔的》編審羅佩清於Facebook發千字長文透露會有續集，身為該劇男主角的馬國明亦有睇到呢篇文，他接受香港01記者訪問時表示：「以我所睇佢篇文嘅理解，佢無話落實㗎喎，佢係有少少拉票咁，好似係叫啲觀眾投《降魔的》一票啦，希望《降魔的》喺台慶頒獎禮有好成績，令到公司落實開拍《降魔的2》咁樣，所以應該係未落實嘅。咁就等公司安排啦，如果監製同編審都有信心開2嘅，我當然ready啦，但都真係要等公司安排，睇下台慶頒獎禮有無好消息。」

馬國明坦言自己暫時未收到有關通知：「我唔知監製編審同杜生（杜之克）會唔會傾咗啲嘢我唔知啦，以我所知係未確定拍唔拍續集嘅。我哋小演員咩都唔知㗎。其實我自己睇《降魔的》個故仔係留咗好多伏線，所以如果要開續集係有機會嘅，決定權都係交返畀監製編審，我嘅信心都係嚟自佢哋。我作為演員有好嘅故事同好角色可以參與演出當然無任歡迎啦。其實有無得開拍續集我都一樣開心，因為都曾經參與過呢部咁好嘅劇集，成個劇組都拍得好開心。」