【誇世代：有片】吳業坤鬧爆監製玩佢　不滿十幾集自己仲未出場

無綫50周年台慶劇《誇世代》入面由吳業坤飾演的「包豹」點都算是男主角之一，但套劇已經播出了十幾集，都仍未見坤哥正式出場。由於劇中講坤哥的靈魂與歐陽震華交換了，所以每逢有包豹出場其實都是歐陽震華 (Bobby) 個樣嚟。可憐坤哥只可以透過倒映或者是照鏡先有得亮相，就連他的樣子講對白時也要配上Bobby音，好慘呀！

忍了十幾集，坤哥終於要爆喇！日前TVB官方facebook網頁《See See TVB》就上載一條坤哥大鬧《誇世代》監製房的短片，仲要被串話：「貴為寫錯字KOL嘅 吳業坤 Ng Yip Kwan，佢寫錯字嘅功力已經去到出神入化，但估唔到，佢除咗寫錯嘢，原來亦都會睇錯嘢，就例如係誇世代個劇本......」說他是自己睇錯劇本才出事。究竟片中的坤哥做了些甚麼呢？原來他發脾氣鬧爆監製。

坤哥嬲嬲豬咁指住監製話：「監製，你依家係咪玩我呀？嗰時你話坤仔過嚟，你做男主角呀，我嗰時梗係好開心啦。嘩，又見到個cast，有歐陽震華啦，有阿田 (田蕊妮) ，有阿聰 (張繼聰) 啦，諗住群星拱照吳業坤啦！依家呢？十幾集都淨係見到啲鏡嘅倒影呀，唔買放大鏡都搵唔到呀！我作為一個歌手，要咪嘴唱歌，係一件好樣衰嘅事，點知我連講對白都要咪嘴，呢個係一個恥辱嚟！」他更指畀看更笑，就連片尾出Ｒoller，廣告商的字都大過他個頭，瘋狂投訊自己完全無得出鏡更唔使講咩發揮啦。

片中坤哥雖然好勞氣，不過睇下睇下又覺得幾好笑，9成都是搞笑喇。坤哥接受電話訪問時坦言：「梗係玩嘢㗎啦，絕對係搞笑嘅。只不過大家有個疑團話點解我咁耐都未出場，咁咪拍條咁嘅片交代下。（咁其實你有冇不滿？）冇，我當初收到劇本嗰時都知係點拍嘅，依家咁樣等觀眾有個期待都係好事嚟。自己抽返自己水幾好玩吖。」