【誇世代】吳業坤秘密操肌1年　為脫毒狂練拳：要瘦過吳業坤！

無綫50集長劇《誇世代》貴為50周年台慶劇，演員陣容當然就有返咁上下。劇中更不乏大隻型男及show肌的「香艷」畫面，先有陳豪上陣除淨條呔俾李佳芯任摸，再有森美赤裸上身大汗淋漓地打拳，真係睇到屋企班師奶觀眾們「紅到面晒」。

其實近年男星要「爆肌」已經是常識吧，連劇中與歐陽震華交換了靈魂的「偽毒」吳業坤（坤哥），都密密打拳操肌。日前（11月23日）坤哥在《誇世代》活動宣傳後就接着接受3個專訪，工作完成之後就急急腳離開。原來就是為了趕去做gym。點解做gym？坤哥就畀咗個好型嘅答案：「我想做返個男人！」

細問之下，原來坤哥的意思是「男仔become男人」，覺得以前的自己太肥沒有男人味。其實坤哥加入娛樂圈已經7年時間。而現時27歲的他也說：「因為我都接近30，所以有呢個諗法。」坤哥表示，這個習慣已經堅持1年有多。「我嚟呢度做gym都差唔多1年，一星期都有2，3次。《超時空男臣》出街嗰時覺得自己好肥，所以先有打拳呢個念頭，想拍戲都好睇啲。」

至於坤哥有否向《誇世代》的「大隻」型男陳豪、張繼聰、森美他們請教，坤哥就回答說：「冇㗎，我怕醜吖嘛。不過見到佢哋咁fit，我都會有動力。」睇相雖然坤哥未算練到六嚿腹肌的身形，不過對比起《超時空男臣》時已經有明顯分別。問到他的操肌目標，他就說：「我想瘦過吳業坤！」喂，吳業坤想瘦過吳業坤，即係點呢？好難明喎。

場地提供： Air Fitness