【Do姐再Shopping：有片】刪剪朱古力篇　翠如BB試食盡顯婆仔性格

由鄭裕玲（Do姐）、「農夫」陸永和C君這個鐵三角孭飛，仲有翠如BB（黃翠如）一齊主持的《Do姐再Shopping》已經播出了5集，真係集集都有笑位㗎。而TVB官方Facebook網頁日前就上載了一段電視無曝光的「蜜瓜篇」短片，比播出街的內容更爆笑，很多網民都留言話笑死了。昨日TVB又再公開了另一段未曝光的「朱古力篇」，講他們一行人在北海道小樽的手信街shopping，於一間朱古力店內瘋狂試食。

相信大家有去過日本旅行都會知道，日本商店在供客人試食方面真係超級大方，如果是細size的食物，好多時都會原件咁樣給客人試食，就算要切開的食物都會切得好大件，所以在日本試食確是好開心又滿足的。而當Do姐一見到前面那間朱古力店門口已經有得試食，就即刻話：「啱你呀，黃翠如。成粒成粒㗎。」明顯知道翠如BB鍾意試食，翠如BB亦好老實不客氣，食足3粒，仲叫大家唔食就讓給她。C君即講笑叫她：「你成盤拎走吖嘛。」陸永又笑她：「你無大志呀。」

他們入到朱古力店繼續試，每當他們睇中那些朱古力，都會咁啱有店員拿出來給他們試食，次次都一大塊一大粒咁，任他們慢慢品嚐。最後他們想試食一款朱古力，扮晒嘢講：「唔知有無得試食呢？」卻竟然沒有店員出現，但同一句對白由Do姐一講再加個手勢，就即刻有人拿着一大碟出來給他們，令C君一臉不爽地說：「玩針對嘅！」陸永就話Do姐：「你啲人嚟㗎？你畀錢請返嚟嘅！」好抵死。而他們試食完都好識做，由Do姐做老細話每樣買10盒，C君又爆seed話：「多謝Do姐，折現吖嘛。」