【使徒行者2．劇透】所有鬼頭仔身份揭盅　許Sir竟然唔係警察？

《使徒行者2》今晚來個高潮位，有兩個大人物身份終於被揭穿。第一個就係樂少(周柏豪飾)，原來佢並唔係真正嘅臥底，佢扮臥底埋卓Sir(苗僑偉飾)身只係為咗報仇，不過並唔係為咗Pak-key（黃德斌）咁簡單，而係為佢阿哥－樂少文。呢個阿哥並沒有在劇中出現，只係樂少自己口講，樂少文先係真正嘅黎Sir臥底，同樂少一樣都係孤兒院長大，在做臥底的過程當中，發現黑警的存在並被其追殺，所以當時走佬去到泰國搵細佬樂少救命。可惜最後都係難逃黑警的魔手，臨死前叫樂少通知黎Sir黑警的事，不過黎Sir又死埋，所以樂少唯有埋卓Sir身，就係要殺晒啲黑警為阿哥報仇。

至於第二位大人物，就係警隊高層，警務處刑事部助理處長許啟發(鄧梓峰飾)，今集佢就現身同魏德信(陳豪飾)正式會面，證明他們是合作的形式，而且表明Madam Cheung(蔣祖曼飾)係佢女人，所以好想殺死樂少報仇，之後仲殺死樂少好兄弟撻Q(謝東閔飾)，不過唔好以為佢真係咁重情重義，遲啲佢就會殺死Madam Cheung個阿媽。同埋原來佢並唔係真係警察，本身係黑社會「雄鷹」頭目大隻豪（趙冠豪），之後後死真正的許啟發再取代其身份，竟然無人發現，無綫真係咁都得？

除咗呢兩個人，今集仲有啲提示暗示速龍的身份，其實佢並唔係真正的臥底，佢只係魏德信派入警方的人，所以佢係雙重臥底身份。最終佢竟然出賣自己的主人魏德信，可惜最後都係俾佢殺死，不得善終。