【使徒行者2】卓Sir組織民間刑事情報科　神秘人將會重生加入

最新一集的《使徒行者2》，卓Sir（苗僑偉飾）終於被人識穿是臥底，所以他亦順理成章重返警隊。不過作為黑警的Ben Sir（魏焌皓飾）緊係唔會咁易放過佢，所以就派咗啲伙記去跟蹤佢，不過當然瞞唔過卓Sir喇，而佢亦都唔會束手就擒，決定要搵一班人反過來調查這班黑警，所以就去咗警察資料庫入面搵吓有咩人可以幫手，結果有三個人名出現，分別係羅小絲（黃山怡飾）、李文雄（陳國峰飾）和佘樂成（喬寶寶飾）。噚日嗰集羅小絲已經出現，在預告中看得到另外兩人也會在今晚出現。

以下內容將會劇透。逃生門在此。

話說今晚呢集卓Sir就會成立一個民間刑事情報科，除了上述呢三個人之外，仲會有埋其餘四個臥底，分別係樂少（周柏豪飾）、梅姐（黃翠如飾）、徐天堂（袁偉豪飾）和Cherry（麥明詩飾）。新加入的三位絕對不是泛泛之輩，各自懷有相屬的技能，羅小絲係前指揮及控制中心警察通訊員，除了口才了得，仲十分擅長角色扮演，很多潛入任務都要靠佢。李文雄係前警察樂隊警員，好鍾意唱歌，最勁嘅就係模仿聲音，即係你平時睇啲電視扮雀叫引走敵人嗰種。佘樂成係前爆炸品處理課警長，一睇就知佢係擅長玩炸彈，不過除咗炸彈之外，其他器材都難佢唔到，即係武器大師。呢三個人就咁睇似足間碟，就好似《復仇者聯盟》入面嘅黑寡婦同鷹眼咁，卓Sir今次真係識揀人喇！

其實除咗呢7個人，仲有一位神秘人之後會加入，就係之前喺泰國被炸死的5個卓Sir臥底其中一個－速龍（楊潮凱飾）。原來嗰次爆炸並無炸死佢，佢仲懷疑卓Sir係黑警，所以一直潛行返香港調查，當然最後都解釋返晒成件事，亦都加入埋民間刑事情報科。