【爸爸去哪兒】Jasper跌親冇人幫　陳小春叫：自己爬起來

大陸綜藝節目《爸爸去哪兒》第五季紅潮不斷，當中陳小春呢對父子更成為大家的焦點，你地仲記唔記得第一集Jasper攬住個大聲公對小春話：「Can you stop angry now？」幾日前應采兒post咗段父子二人拍攝最新一期節目的片段，發現Jasper又拎住大聲公扮雞仔叫，叫叫下仲反凳跌埋落地。

最新一期節目入面，節目組就去咗湖南鳳凰古城拍攝，而今次小春揀中的屋企就養咗幾隻雞仔，Jasper見到佢地當然愛不釋手，所以坐咗係屋企門口同雞仔玩。佢就坐係啲雞仔幾米前，用佢最愛的大聲公，對住啲雞仔話：「你們小雞們，快點過來！」再好得意咁扮雞仔「咯咕」、「咯咕」。

Jasper可能叫得太忘形，挨係凳背挨得太前，竟然連人帶凳反低咗，搞到小春同一班現場的工作人員當堂嚇一嚇，但小春仍然用兇狠的聲線叫Jasper：「自己爬起來。」不過叫完之後，可能小春都意識到啱啱果句有啲惡，所以即刻學Jasper啱啱咁「咯咕」、「咯咕」叫，氹返佢起身。好彩Jasper冇咩大礙，可以自己起返身，但心愛的大聲公就跌爛咗。不過最緊要都係Jasper冇整親，大聲公就隨時可以拎過一個，所以Jasper唔使咁唔開心喇。

不過應采兒似乎就唔係咁樣睇依件事喎！皆因佢post依條片的caption就寫住：「這位攝影師很淡定！」睇嚟小春返到屋企要跪住玻璃，老婆先要聽佢解釋點解唔即刻去扶Jasper喇。