90年代童星去晒邊？ 「ETV一哥」成展權原來幾靚仔
上回講到童星Jacky仔話咁快就已經咁大嗰，令到不少讀者都好懷念過往在電視熒幕上出現過的童星。雖然童星長大後嘅星途未必會好似小時候一樣受到萬千寵愛，但亦可以從另一個途徑令自己發光發熱。圈中有不少藝人都是童星出身，最出名就非馮寶寶同小柏林、張繼聰莫屬。而近年最紅嘅「童星演員」，就一定係在影視方面都好多作品的張繼聰，1984年只有4歲嘅佢已開始演戲，長大後亦入讀演藝學院讀戲劇，其後2005年以歌手身份出道，2016年憑電影《陀地驅魔人》入圍第35屆香港電影金像獎「最佳男配角」。
除了張繼聰，亦有好多童星長大後選擇回到娛樂圈繼續進行演藝工作，2003年只有5歲嘅原島大地憑住超得意冬菇頭與張栢芝及劉青雲拍攝電影《忘不了》，今年同Jacky仔一樣已經19歲喇！中日混血兒的原島大地去年於金像獎頒獎典禮亮相，超靚仔嘅樣隨即被網友人肉搜索！而剛過去嘅暑假他亦從日本回港，與湯怡及陳茵媺拍攝電影《日月星》，相信好快佢又會變成新一代小鮮肉！
當然都有一些長大後無選擇入行嘅童星，例如經常在ETV教育電視出現嘅成展權，幾乎每個科目嘅ETV都係佢，係「ETV一哥」。此外亦演出過不少經典劇集，例如《十月初五的月光》，《陀槍師姐IV》等，轉眼間佢今年已經29歲，同Jacky仔一樣係城大讀書，但他就修讀政策與行政學，大個咗都幾靚仔㗎。而細哥哥5年嘅妹妹成珈瑩，大家可能會比較有印象，佢同哥哥一樣都參演過TVB好多劇集，例如在《烈火雄心II》中演王喜女兒的她，甚識做戲，當年令到不少人流過好多眼淚，而珈瑩讀小學的時候仲奪得朗誦節比賽冠軍！！
除了成氏兄妹之外，還有來自澳洲嘅Matthew Ｍadvedev，就咁講呢嗰名你未必會知，佢就係2006年由成龍及古天樂合拍的電影《寶貝計劃》中超級可愛嘅Matthew BB，雖然今年只得12歲，而家係澳洲讀緊中學，btw最重要嘅係佢依然keep到一副勁可愛又得意嘅靚仔樣，再遲多幾年一定不得了！！
去年，金像獎其中一節亦有向一眾童星致敬，分別邀請了一眾過往曾參演過電影的童星們出席，而馮寶寶當然就做代表向嘉賓致意，「有好多人就話做童星犧牲了童年歲月係片場入面，不過我就覺得我地比一般嘅小朋友仲幸運，因為我地嘅同年歲月記錄係電影入面。無論係以前，現在定將來，都係最後生嘅。」其實童星係唔少觀眾心目中，分分鐘比主角們更搶鏡！