童星Jacky仔長大了 為學業淡出幕前：最記得劉德華同我玩
講起「Jacky仔」呢嗰名，相信你腦海會諗起佢擁有一副勁得意圓碌碌嘅樣子，其實佢今年已經19歲喇。Jacky仔今日出席活動時，少了當年趣致模樣，換來的是乖仔斯文look出現。讀緊城市大學媒體與傳播系嘅佢，依然好熱愛演戲，雖然近年傳媒寒冬，但Jacky仔嗰團火依然無熄，「希望畢業之後可以從事返傳媒行業，我真係好有興趣！」 聽完都覺得好有heart！
2003年當年只有4歲嘅Jacky仔就參加了由港台舉辦嘅節目《點蟲蟲 開開心心學飛》而入行，「嗰陣哥哥係主持仔之一，當年製作組就去我地屋企做訪問，見到我都幾得意，所以就開始拍下港台同教育電視嘅節目。」適逢當年沙士襲港，佢就與黃秋生合作拍攝《1: 99 抗炎短片 - 我的飛行家族》而開始為人熟悉，「拍攝完短片後，嗰陣負責拍短片嘅導演張堅庭先生就叫我家人不如試下寄信去TVB俾我做童星，好快TVB就有回覆，開始拍劇。」Jacky仔指TVB都好好，好肯遷就佢返學時間，「嗰陣我讀上午校，一放學就去拍，都無乜衝突。同埋佢地都唔會俾一啲好難嘅角色我做，都幾開心。」
提到拍過咁多套劇集，邊位演員令佢最深刻印象？Jacky仔諗咗一陣就答，「係歐陽震華，2007年同佢拍《爸爸閉翳》，做佢個仔。真係隔一兩日就見一次，佢成日都同我玩，有時又會教下我。另外仲有劉德華，當年拍《童夢奇緣》我做佢年輕版嘅弟弟，雖然同佢無戲份，但佢都有嚟探我地，又會關心我讀書呀，又會同我玩。」
小時候可以同咁多巨星合作，真係唔係每位童星都會有嘅經歷。2009年，Jacky仔因為準備升中學開始淡出幕前，突然之間無咗童星嘅光環，會否有點失落？他就話，「我覺得心態要轉變嘅，始終童星長大後就會比較少啲機會拍攝，咁我都覺得學業要緊，始終唔可以忽略。咁而家入咗大學，有機會同時間咪接返，其實做童星對我嚟講係一個幾有趣嘅經驗。」
Jacky仔表示身邊有好多同學都知自己就係當年嘅「Jacky仔」，仲話同學有時都會同佢開玩笑，「因為上年新聞都有報道過，咁咪知道我係讀傳理，其實佢地都係睇住我大。佢地而家有時係地鐵站都會見到我細嗰拍嘅廣告照，都會同我開玩笑話：『嗰個係咪你呀？』我會話係呀，張相係小時候拍嘅，都無乜話好特別，都係當我普通同學。」有邊個大學生唔想GPA坐3望4，原來Jacky仔讀書都好勁，「今年有3.6，以呢嗰成績希望下年Year3 可以到美國或者英國做exchange，學多啲嘢！」咁勤力讀書咁感情生活點先？估唔到對鏡頭完全唔怯場的他，竟然會在識女仔方面被考到，Jacky仔就好怕醜咁話，「無呀而家依然係單身，都係想先專注學業。（咁鍾意咩類型女仔？）性格同價值觀相近，年紀都大細都唔係問題。」