【壹號皇庭】王菲演檢控官原來做番自己　監製：佢想點做就點做

最近不少王菲fans，每晚都收看無綫深宵重播劇集《壹號皇庭II》，因為可以重温24歲的她（那時她叫王靖雯），亦可以緬懷一番自己年青日子，劇集1993年播映，92年拍攝，那時的王菲雖未去到神級，但在後生仔心目中已是天后，亦有不少hit歌，除了《壹》劇片尾曲《執迷不悔》外，亦有《容易受傷的女人》《Miss You Night & Day》《靜夜的單簧管》《多得他》等.....未必每首是冠軍歌，但每一位都聽過，當時流行的程度，比現在的《越難越愛》《矛盾一生》更加厲害，不相信可以問你家姐、媽咪，她們一定聽過....除了好歌，王菲前衞造型，尤其那個「one length頭」當時來說好「潮」。

王菲當時得令，所以吸引到《壹》劇監製鄧特希，他接受《香港01》訪問時，說：「做監製當然要計算，第一輯鄭秀文、到第二輯就搵王靖雯，因為佢哋up and coming，我想吸納一下年輕人嘅市場，阿菲即係當時叫王靖雯啦，做戲就....簡單嚟講就做返自己，有啲導演拍佢嗰陣就會同我講返，「咦！王菲咁樣喎...」，但當時我就覺得，如果呢個演員係咁演，但你夾硬迫佢去用另一個演法，咁出嚟嘅效果，大家都唔會好，而拍電視要快，亦冇時間俾佢慢慢消化，所以我就同啲導演講，唔好搞王菲，佢想咁做就由佢做啦。」

王菲在劇中真我演出，雖然演技不及其他主角，但骨子裏散發着獨有氣質，那種天后自信，大家feel得到，就連當時監製鄧特希都feel到，他說：「去到拍攝尾段都幾得意，因為我每日都要睇廠帶，（監製每日工作之一，翻睇昨晚三機拍攝的廠景），王菲初初就唔係好有經驗，仲有啲緊張，但去到後期法庭戲，我睇廠帶發現佢自己做完之後，仲教人做戲呀，佢會提醒做證人嗰啲特約演員，「你要咁呀，你要點點呀....」我睇到嘅時候就覺得好好笑，當其他人覺得佢啲戲做得好似同劇本有出入嘅時候，但王菲就已經好有信心，仲情不自禁去教下人。」