【胡說八道真情假期】姚子羚同男友蜜遊　李施嬅死跟：無人同我去

大曬閏密姊妹情的無綫節目《胡說八道真情假期》昨晚播出第二集，胡杏兒、胡定欣、胡蓓蔚、姚子羚、李施嬅與黃智雯六位好姊妹，繼續好開心又好嘈咁在澳洲食買玩，兼同觀眾分享下她們的感情有幾好有幾close。繼上集她們因為在機場見到智雯而驚喜到喊，今集一樣有喊包的出現，就是定欣、杏兒同智雯喇，講到好姊妹曾經怎樣去幫自己，都不禁感動落淚，完全是真情流露，真係好感性呀！唔知之後會否集集都有人喊呢？

而其中有幕就講施嬅話自己試過跟子羚與她男友鄭子邦兩人一起去旅行：「子羚同阿邦去旅行，係我自己要痴住佢哋。」杏兒即問施嬅是否做人電燈膽，施嬅即笑謂：「係呀。」，施嬅更搞笑地雙手抱頭表示：「Oh my god！阿邦住嗰間酒店要成六千幾蚊一晚囉！」與男友同是素食者的子羚就解釋說：「唔係呀，我哋兩個食菜吖嘛，我哋喺食嗰方面cut咗，就住好啲。」施嬅即玩踢爆說：「你哋食菜吖嘛，食菜都一千蚊一個人㗎。」子羚就反擊施嬅說：「嗰間餐廳你揀㗎。」果然是好姊妹，就算原本是與男友的二人世界之旅，都不介意有姊妹join埋來做電燈膽，絕對不會重色輕友，姊妹情深。

香港01記者電話訪問了施嬅以及子羚問她們有關這次的旅行，她們是去日本東京，全個旅程都是住同一間六星酒店，亦即是六千多蚊一晚那間。子羚說：「因為日本啲酒店比較細，嗰次我哋想住舒服啲，唔係咩豪使，我哋食都食好平，食下烏冬呀菜嗰啲，係有一餐施嬅帶我哋去食素食懷石料理先要一千蚊個，其餘時間都食好平。」問到施嬅為何會做人電燈膽，她說：「無人同我去，我又想去咪搭單跟埋佢哋去囉。」雖然她是一粒電燈膽，但原來她非常之識趣，會給時間子羚和男友二人世界：「我會自己走開去食嘢，佢哋食素，我食海鮮，咁我咪自己食，邊食邊同個廚師傾下偈囉。」而子羚就謂施嬅非旦沒有阻住她拍拖，多個人一起旅行仲開心。