【同盟】姚子羚真實的愛情世界跌過痛過　感恩現在覓得理想男朋友

姚子羚（Elaine）於無綫劇集《同盟》中飾演的Kate與陳山聰飾演的Kent愛得轟烈，浪漫又激情。現實生活中Elaine的愛情路並不平坦，經歷跌過痛過之後，現在終覓得理想男朋友鄭子邦，兩人更視對方為結婚對象，Elaine對這段感情非常珍惜，不需要轟天動地，只求細水長流；Elaine坦言鍾意浪漫感覺，但浪漫對她來說很簡單：「我哋比較實際啲，其實男朋友為我下廚煮意粉整pizza，我睇住佢整已經覺得好sweet，他本身唔識煮嘢食，會特登為我下廚，我覺得成件事好浪漫。」

她亦喜歡收到驚喜，談到男友令她最驚喜的一次，她說：「有次我喺外地拍劇拍咗一段日子，好耐無同男朋友見面，他偷偷地來接我機，送我返屋企，原來還預先準備了一束花放在床上，他本身並非浪漫型，但都願意為我花這種心思，我覺得份外驚喜。」而Elaine也喜歡為男友製造驚喜，會自製禮物給男友：「我試過整生日蛋糕、甜品、手工剪貼、Album等，喜歡獨一無二。我都試過將份禮物收在床下底，再喺屋企貼一啲Hints，等男友慢慢搵出嚟，又試過寫毛筆字送給男朋友。不過而家真係太忙冇時間。」

至於是否經常收花，Elaine說：「又唔係喎，其實我主張大家唔好送花給我，但偶然一次都好開心，有邊個女仔唔鍾意收花？但就唔好情人節嗰啲日子送，會特別貴，唔值，不如將買花的錢用來做更有意義的事。送花畀我最緊要講心意，唔使話要好大紮，真心嘅一支都夠開心。」子羚樣靚身材正，咁好條件又會否很難追求得到呢？「我是一個典型的天蠍座女仔，直覺好準，鍾意就鍾意，唔鍾意就唔鍾意，如果有感覺就唔使對方花好多時間來追求自己，同樣如果唔鍾意人也不會浪費人時間，對人公平些，唔會畀人假希望，男仔約我我會有好感先應約，絕對唔會收兵。我會做返自己，展現返真我個性，我比較男仔頭的性格，唔會扮到唔係自己咁。」

Elaine在情路上當然也試過受傷：「之前有男朋友試過出軌，我啲朋友話我會好似福爾摩斯咁去發現蛛絲馬迹，例如他變得電話不離身，喺張床揾到有長頭髮，我亦會睇佢嘅梳化，有冇其他頭髮，直覺會令我feel到男友有啲唔同，有次他借了他的電話卡給我，突然有個內地電話發了個信息給他，寫住『親愛的，你想我嗎？』我問對方係邊個，對方回我『你咁快唔記得我？』我咪覆對方話『唔好意思，我係佢女朋友，會轉告他知你找過他。』對方即刻話『唔好意思。』我記得之後仲要同男友去睇戲，我一直忍到睇完晒套戲先問佢，佢都無得解釋，最後當然分手收場。我明白件事已經發生了，唔會潑婦罵街去責問對方。我失戀時都有喊過，都會搵朋友傾訴，其實分手時唔係最痛，而是個過程最難捱，喊完就同自己講要重新出發。」而最令Elaine接受不到就是男朋友不尊重她：「只要對方尊重你，根本就唔會做傷害你的事，做任何事都會顧及你感受，尊重好緊要。」Elaine感恩現在有個好好的男朋友，很關心和很愛錫她。她自言現在已經過了最恨結婚的年紀，不會因為要趕結婚而給自己壓力。