【國際小姐】王詠珩備戰11月出選　香港代表評港姐：注重娛樂性

今年23歲嘅王詠珩身高5呎8吋，但原來曾經係肥妹仔一名，Wing：「最肥係中二嘅時候，我係一個肥妹，128磅呀！」佢話肥到唔想再提，所以再三要求都唔肯交出相片。

佢又極之為食，尤其梅菜扣肉、東坡肉係超級至愛，又喜歡凌晨2點食杯麵，就算做咗模特兒之後依然戒唔到，直至最近入圍咗國際小姐至加緊操fit：「我最嚴重係個肚腩，最鍾意大魚大肉；其他佳麗好好身材，一啲肚腩都冇，相比下我係輸蝕。做model好少着啲少布衫，但係選國際小姐要着bikini想縮都冇得縮，而家嗲哋叫我食梅菜扣肉我都耍手，同埋要多啲打拳做運動囉！」阿Wing學泰拳已有兩、三年，現時打拳之外每晚要做sit up等收腹運動，希望趕得切喺選美前修身。

講起今屆港姐連試食都算係才藝表演，阿Wing只係笑唔想評論，但表示將會同澳門小姐Sofia喺國際小姐決賽日合作表演跳舞，Wing：「我哋商量過一齊表演，我哋兩個都學過跳舞，但係佢跳開葡國土風舞要一大班人跳，所以決定就我跳girls hip hop，不過未坐低傾跳邊隻，暫時未睇得住。」佢解釋國際小姐選舉同港姐有好大分別，國際小姐可以選擇做唔做才藝表演，就算表演亦未必會加分，但佢同Sofia就希望趁呢個機會表現下自己。

不過比賽臨近亦令阿Wing心情緊張：「瞓唔着，壓力大有時臨瞓前諗起會突然心跳加速，feel到有啲焦慮。」所以更加需要打下拳減壓。

阿Wing參加國際小姐而唔去選港姐，係因為覺得更有國際性，認為兩者性質好唔同：「國際小姐更注重儀態、表現、catwalk等等，但我覺得香港小姐畀大家嘅娛樂性係更重要，所以性質唔同唔係質素冇咁好，而係大家目的都唔同！」