【任噏亂評】港姐冠軍點解令人討厭　自信雷莊𠒇其實衰啲乜？

2017香港小姐嘅賽果令到好多人喺呢幾日多咗唔少茶餘飯後嘅話題，個個都爭住話邊個邊個唔抵，邊個邊個唔值。不過賽果就已經出咗，無論係被傳媒熱捧嘅伍樂怡，有家姊光環嘅張寶欣，愈跑愈有力的何依婷，通統都輸俾雷莊𠒇（Juliette）呢個黑馬。先唔理無綫嘅選舉制度，反正選咗出嚟都無得再推翻，但係Juliette當選完之後立即惹來大眾嘅負評，究竟係點解？

話明選美，個樣一定係大眾第一個專注嘅地方，Juliette樣子有別於一般香港女性，帶點兒混血的味道，而大家對佢樣貌最大嘅批評始於佢棚牙。不過審美呢家嘢就好主觀嘅，想當年陳凱琳都係咁上下樣喇，咪一樣選到。既然個樣未必係大家負評佢嘅主因，仲有咩因素令到佢俾咁多人鬧呢？

除咗呢樣嘢，喺選完嗰一晚，當各位參賽者，無論落選又好拎獎又好，都紛紛喺網上平台打返啲感言，多謝吓大家咁。但係Juliette繼續維持住佢一貫自我嘅表現，喺係自己Instagram上留言話：「So this happened...」睇埋堆hashtag，「#queen #firstplace #winner #champion」剩係呢幾個已經睇得出係真係自信爆棚，不過就一個thanks都未有提及過。其實佢自我都唔係第一日知嘅事，未選之前TVB有個泳裝綵排及試戴后冠環節，雖然個泳衣係有啲老土，不過佢就好大膽咁講：「我自己就唔會揀呢啲泳衣。我諗呢個泳衣係中國啲，like more conservative（保守）。我返去加拿大嗰邊可以再show-off啲。」連自己老闆都敢窒，可能TVB就係睇中佢呢種咁自我嘅性格。

睇返近幾屆嘅港姐冠軍，前兩年的馮盈盈和麥明詩都明顯係做貼地路線，兩位講嘅嘢都比較貼近而家香港嘅時下話題，亦因為呢個point漸漸得到一班人支持。再對上兩屆的邵珮詩和陳凱琳，則走高貴路線，無論係外貌定談吐都比人感覺係大方得體，雖然比較離地，不過都印象鮮明。咁今次Juliette嘅形象又係咩？佢連季節呢個詞語都唔識，我好難相信佢可以貼近香港嘅話題，喺佢個直播live入面不停講I don't care，話人智慧唔夠，話人教育不足，更加同高貴拉唔上大纜。唔通作為一個香港小姐嘅冠軍形象就係夠自我？

好多人都會話，咁佢都係表現自己真性情嘅一面啫，有乜問題？問題在於香港小姐一向自稱係「美貌與智慧並重」，Juliette美唔美就真係見仁見智，不過以文章上述的幾個point，佢嗰種處事手法係多麼的唔圓滑，當你本身已經喺一個無公信力嘅選舉制度下贏冠軍，係咪應該收一收歛，等大家啖氣下一下，而唔係風頭火勢嗰陣仲要去撥火，智慧去咗邊度呢？

諗深一層，大家對佢咁大怨氣仲有一個原因，就係本身嘅大熱門全部都落晒馬。講明大熱門就一定有班fans撐架喇，伍樂怡基本上第一日就已經展現咗佢嘅冠軍相，最後竟然連三甲都入唔到，成晚陪跑乜都無。何依婷正宗本土代表，城大一級畢業，道地港女靚樣，又俾Juliette壓住只得第二。金美黎廣受網民歡迎，Big Big Channel心心大比數拋離其他佳麗，一樣五強就byebye。各自嘅fans加埋嘅怨氣絕對唔講得笑，不過多要幫Juliette講返句說話，呢啲一切都係TVB嘅安排，唔可以怪佢嘅。

根據傳媒披露，Juliette自細就好鍾意跳舞，不過佢知道跳舞係賺唔到錢，一定要出名先得，可能就係因為咁回流香港返嚟參選。其實追夢真係好熱血，我都認同佢想跳舞跳到出位，出名係一個好方法，不過如果以佢而家呢個情況，出咗嗰個名都一定唔會係好名。上一上Ｇoogle打雷莊𠒇呢個名，差唔多全部都係負面嘢，其實佢係咪應該收一收自己咁「火辣」嘅性格，用吓追夢去包裝唔係幾好咩？