【童年回憶】《閃電傳真機》聚會 譚玉瑛姐姐號召力強一圍變六圍
「循環不息的宇宙如在照顧著地球……」如果睇到呢句歌詞覺得係有聲POST，咁你就唔覺意曝露咗年齡秘密啦！90年代最受歡迎兒童節目《閃電傳真機》主題曲，當年幾乎個個小朋友都識唱，放學4點衝返屋企睇電視嘅回憶，真係諗起都不禁會心微笑。播出十年間有唔少經典環節，無論主持或小童星都令人印象深刻，日前佢哋舉行聚會，台前幕後足足67位出席，你又認得幾多位呢？
《閃電傳真機》由1989年9月接替《403穿梭機》，一直到1999年大除夕播出最後一集，整整十年時間，主持人包括譚玉瑛、麥長青、黎芷珊、黃智賢等，帶住小童星們演出一個個富趣味及教育意義嘅環節，好似《Auntie烏卒卒》、《叉燒包與漢堡包》、《殭屍爺孫》、《麥氏偵探社》、《認字特警》等。
眨眼間節目已經完結了十幾年，原來一班台前幕後都仍有KEEP住聯絡，8月19日晚更於尖東一家酒樓舉行「搞大咗《閃電傳真機》同學會」，現任奇妙電視主持黃芳雯（Paula），原來當年係節目小童星之一，見返一眾童年好友同大哥哥大姐姐，佢都表示非常興奮：「其實咁多年來，傳真機各個唔同組別，好似我地小演員同啲主持、製作組等，都會約食飯飲茶，不過今年真係第一次咁齊人，足足有67位﹗」
Paula表示本身預計一圍食飯，到最終筵開六圍，估計因為訂好日子後，譚玉瑛姐姐一早確認會出席，所以大家都特別踴躍，個個話想帶多一兩位，就變到咁墟冚﹗「大家都好有心，我提議整banner俾大家影相，anna姐姐話環保啲不如利用場地螢幕，搵佢囡囡幫手整logo。仲有呀，無諗過去聚會都好似婚宴咁有大家成長片段睇，不過唔係一對新人，而係有幕後人員將在場人士當年嘅相同片剪輯埋一齊，足足有成7分幾鐘﹗」
現場仲有切餅儀式，個大蛋糕居然係譚玉瑛嘅作品﹗身為美食節目主持嘅Paula都大讚好食：「個蛋糕係譚玉瑛姐姐親手整架﹗之前佢都無出聲話想俾個驚喜大家，係個榴槤蛋糕足足五六磅重，仲好好食添﹗」Paula話大家都玩得非常盡興，希望每年都gather一次：「好多人睇完Facebook都問點解唔叫埋佢﹗睇嚟下次要Book多幾圍啦﹗」