【美食博覽】李家鼎即場教秘技師奶圍實　鼎爺瘦足9磅：停唔到！

鼎爺李家鼎同譚玉瑛今日殺入灣仔美食博覽宣傳第二輯《阿爺廚房》，吸引咗過百位老友記捧場及試食鼎爺手勢。鼎爺透露拍《阿爺廚房》令佢瘦咗9磅，而下月開張嘅私房菜館投資咗7位數，及向TVB請假一個月，未知有冇時間拍第三輯。鼎爺今日可以話將成個《鼎爺廚房》搬咗入美食博覽，即席教現場觀眾煮咗一味雜錦涼拌，現場七成係上咗年紀嘅媽媽級觀眾，好畀心機聽鼎爺教煮餸。雖然呢道菜唔使用明火煮，但鼎爺一樣傳授到秘技：「切皮蛋用刀會黐住咁點切？」秘技係用牙線，鼎爺更示範用牙咬住牙線一邊，用手揸住另一邊，然後將皮蛋𠝹開，全場拍手讚賞。鼎爺又即場傳授刀功，媽媽級觀眾都非常受落。問到鼎爺幾時開始入廚，譚玉瑛就代答：「初初佢爸爸係叫鼎爺阿媽煮啦，但係鼎爺好孝順，以前冇冷氣又用火水爐，佢見媽媽咁辛苦就幫下手，慢慢就喺媽媽度學到嘢，就成就到今日嘅鼎爺。」原來鼎爺拍攝時經常向譚玉瑛「呻」所以至知咁多嘢。

鼎爺接受訪問時透露已向TVB請咗一個月假，因為要打理佢投資嘅私房菜，下月3號就會開張，選址銅鑼灣登龍街，現時客人預訂已去到出年1月，佢話有TVB前高層一早就訂位「羅仲炳嗰班呀、周梁淑怡都嚟。（會唔會收平啲？）冇得平，一視同仁，呢啲嘢規規矩矩，但會有啲優惠嘅，唔係錢方面。」佢話會堅持自己買料同下廚，如果要拍劇或做節目的話唯有就時間。

《阿爺廚房》嚟到第二輯，譚玉瑛就話拍攝過程幾辛苦，因為好趕，但自己肥咗3磅，佢解釋：「因為我冇佢咁大壓力。」鼎爺則反而瘦咗：「我瘦咗9磅幾呀，11個鐘頭，1個鐘頭食飯，佢唔係刻薄而係個節目係咁做，停唔到嘅，一停就冇咗個heart。」事後鼎爺將錦繡涼拌分畀現場觀眾，十幾位家庭主婦排隊品嚐，食得津津有味。其中陳太太大讚好味：「我專程嚟見下鼎爺，我細個睇佢做戲覺得佢好惡，原來佢識煮嘢食又咁好人，佢個節目教嗰啲菜都係我細個食過嘅，勾起咗好多回憶呀！我會跟佢煮畀啲仔女食。」