「Gay界男神」林耀聲被男人搞會：唔好再搞喇！
撰文：何志衡
出版：更新：
電影《起底組》今日舉行開鏡拜神，話明起底組就梗係有網絡宅男，而林耀聲就飾演呢位網絡宅男，原來佢平時都鍾意上討論區。
林耀聲話：「有啲吸引嘅主題我都會㩒入去睇下，尤其喺facebook瘋傳嗰啲都會睇下。」佢女友張沛樂（沙律）經常有靚相出現喺討論區，林耀聲都會𥄫實：「佢（沙律）都會send俾我睇，幾好吖，有人講好過冇人講。」
戲中林耀聲同鄧月平(Larine)有較多對手戲，不過阿聲嘅角色怕醜又內斂，好切合佢本身性格：「戲入面游學修對Larine有意思，所以我就冇囉！」問佢喜歡Larine定女友沙律多啲，佢就好大聲咁答：「梗係沙律啦！你咁問我！」
日前旅遊達人項明生涉嫌非禮男見工者被帶署調查，身為「gay界男神」嘅林耀聲就話如果被男士毛手毛腳會拒絕：「大嗌唔好囉！會縮開同埋同佢講：唔好再搞喇，再搞報警喇！」被摸邊度會嬲呢？「睇心情啦！心情唔好摸下手仔摸下指甲都嬲呀！心情好其實都唔好嘅，睇佢有冇侵略性，如果有侵略性就叫佢停。」男定女都好，要識保護自己吖嘛！