【後生仔傾吓偈】馮盈盈唔認公主病　同居有功能：負責煮飯整電器

馮盈盈(Crystal)要為自己不是公主病澄清喎！話說昨晚的《後生仔傾吓偈》探討的主題是跟伴侶去旅行，大家都分享自己跟另一伴出埠的經歷，雖然無講出一些抵死纏綿的情節，不過都有不少搞笑位，例如KOL波波曾經當着現任男友跟前度去旅行，還有人因為幫女友拍照拍得不漂亮而被詐型。而Crystal則說自己當年和男友一起參加exchange時，基本上是過著同居的生活，但自己只會煮飯卻不會洗衫洗碗，自嘲被男友發現自己的「另外一面」，結果網民都說她是港女、公主病。

不過在接受《香港01》訪問時，Crystal指自己已經今時唔同往日，她說：「其實我而家係識做呢啲家務架，例如洗衫同洗碗，因為喺我節目提過嘅exchange之後，我返到香港都係住宿舍，呢一年宿舍生活因為無人幫，要自己獨立，所以要自己料理返啲嘢咪學識咗。坦白講，我而家平時又真係少機會做呢啲家務，因為屋企有工人姐姐幫手。我又唔覺得我唔識洗碗同洗衫係港女或者公主病，因為呢啲係各有所長啫，我識煮飯，我識整屋企大小嘅電器，可能因為我以前中學有讀過電腦，屋企嘅電視電腦有咩問題都係搵我去整，新買嘅電器都係我負責set。咁我覺得都係各有所長，我負責煮飯同整電器，另一伴就做我唔識嘅嘢，咁總有啲嘢係唔識架嘛。」想不到Crystal竟然會識整電器，這可是不少女士們的天敵。

但在節目中亦提及過，如果過份依賴工人姐姐，將來的小朋友可能就會被寵壞，甚至變成第二個乜都唔識做，Crystal指：「我諗如果將來要組織家庭，有咗小朋友，我諗都好大機會請工人姐姐幫手照顧。雖然講結婚生仔仲係好長遠，但係就算婚後我都應該會繼續做嘢，唔會做全職嘅家庭煮婦。咁嘅情況下都需要一個工人姐姐喺我做嘢嘅時候照顧返個小朋友同埋屋企嘅鎖碎嘢，咁我喺小朋友細嗰嘅時候培養返佢做家務嘅習慣，幫工人姐姐一齊做，有時工人姐姐放假，就最啱叫小朋友做返自己啲家務。」

這個節目已經做了接近三集，討論的聲音沒有因為時間或者放在J5播放而減少，其中一個原來就是節目中不少有黃色笑話出現，今集又提及到「食蝦條」，究竟黃色笑話是不是節目中既定的情節呢？Crystal說：「其實講嘅時候真係無心要講呢啲，只不過大家真係好free咁傾，如果出到嚟嘅效果大家係覺得有趣嘅咁都幾好，係節目其中一個想要帶出嘅感覺，開心同輕鬆，呢啲嘢都好主觀嘅。」其實節目本身有些黃色笑話都是本身想歪了才會出現，一笑置之吧。