朱晨麗愈變愈靚被質疑「變樣」　否認有愛情滋潤：而家依然空窗期

朱晨麗（朱朱）今日（5/8）現身灣仔出席《賈思樂 Happy Together 50年 In Concert》記者會，朱朱受訪時表示與賈思樂相識多時，今日專程來到撐場：「其實我自己好鍾意唱歌，同時亦好鍾意聽佢嘅歌，可以話由細聽佢嘅歌長大。（叫佢教你唱歌！）唔敢呀，因為如果佢要教我唱歌嘅話，我諗佢係要用好多時間去教我，加上我知佢好忙，未必有時間理我。」

對於近來愈來愈靚，惹網民質疑「變樣」。朱朱笑言：「點解你哋對我咁好嘅，成日寫我個樣變靚嘅，其實靚係開心嘅，但對我嚟講又冇乜大變化。（有咩秘訣？）其實係食得清淡啲，就好似早排返去內地拍嘢，我都係食白烚雞肉同雞蛋菜，變咗嗰段時間啲皮膚係靚咗，成個人嘅狀態都好唔同。（變靚另一原因係有愛情滋潤？）咁又唔係嘅，又唔關事嘅。（咁即係有！）唔關事，係飲食方面。（而家單身？）咁而家依然空窗期啦，我會努力，多謝大家開心。（小鮮肉考唔考慮？）年紀就冇特別介意嘅，最緊要係相處合唔合適。」