環球小姐2024｜口罩小姐徐蒨寧參戰唔怕被爆黑歷史：每人都有過去

香港區「環球小姐2024」（Miss Universe 2024）今日（3/8）於紅磡進行首輪面試，主辦單位特別邀請1998年香港小姐冠軍及1999年香港環球小姐代表向海嵐擔任星級評判，選出15強的香港區環球小姐候選佳麗進入準決賽。

其中，今日現身面試佳麗有ViuTV最後一屆口罩小姐亞軍的徐蒨寧（阿姨），她接受《香港01》訪問時表示：「可能之前嘅經驗，令我學到好多嘢，同埋豐富到我嘅人生，所以決定嚟選美。（怕唔怕被爆黑材料？）其實我就唔驚嘅，因為每個人都有過去，而我覺得好嘅，又或者唔好嘅，都係得意嘅回憶。我諗個人成熟咗好多嘢都唔介意。（你唔介意，但你老公可能介意！）我暫時諗唔到有咩黑歷史會影響到我哋夫妻關係。（會唔會同老公備案先？）其實喺我哋結婚前已經將所有嘢向佢備咗案，除非我唔記得咗啦。」