監製王心慰效力TVB 35年　榮休宴星光熠熠︰今晚都係我嘅成績表

無綫監製王心慰（Amy姐）榮休，今晚（2日）喺將軍澳延開10席。Amy姐效力TVB 35年，代表中有《烈火雄心》、《天幕下的戀人》、《巨輪》、《忠奸人》、《梟雄》、《黃金有罪》等。所以今晚嘅榮退宴，邵美琪、馬德鐘、方中信、姜大衛、唐詩詠、鄭嘉穎、陳凱琳、馬德鍾、黃建東、樊奕敏、車婉婉、譚凱琪、賴慰玲，助理總經理珍姐（曾勵珍）及多名監製、導演均有到場祝賀。

Amy姐接受訪問時表示幾年前已計劃退休，原因想俾多啲時間屋企人。「掙扎咗幾年，前幾年應該要做，始終有停嘅一日，享受晚年。」Amy姐又謂雖然每年都會去旅行，如今更可光明正大排多幾個地方 。「好耐無放假，有時我攞咗假都返公司做嘢。（記︰邵美琪話你係佢復出條件之一）要停一停先，我復出都可能遲啲，呢個世界好多嘢講唔定。」

Amy姐又話今晚見到唔少一齊成長嘅同事，亦有新一代嘅演員，並謂︰「其實都係我嘅成績表，證明好多人都OK我。（記︰最唔捨得啲咩？）同事，因為其實要做仲有好多戲可以做，有啲Artist都好對佢唔住，想開戲俾佢但啲期夾唔到，會有遺憾。」