【溏心風暴3】李司棋要與時並進講潮語　夏雨未夠喉：想拍第4輯

10年前播出的TVB劇集《溏心風暴》一定係經典中嘅經典，話咁快已經嚟到《溏心風暴3》，晚上一眾演員包括夏雨、李司棋、米雪、關菊英、黃宗澤、王浩信、岑麗香及陳敏之等等出席煞科宴。提到劇中金句都經常被網友瘋狂loop，到宜家都仲啱用。司棋姐透露今次講得最多唔係金句而係潮語，「一定係，除非唔係！」

司棋姐表示劇集播出嘅時候可以吸引多啲後生仔睇，「我哋今次好與時並進，講好多潮語例如一定係，除非唔係！我剛見到劇本嘅時候都以為佢寫錯，完全唔知咩意思。」司棋姐其後笑言，「希望後生仔一睇到嘅反應係套劇唔老土，而係好潮！」至於夏雨就話今次拍得好開心，「同成班老友一齊拍完全唔覺拍完，有機會都想拍第4輯。」

提到昨日歐陽佩珊因病離世，曾與對方合作劇集《楚留香》的夏雨都感嘆人生無常，「好耐無見佢，但知道佢退出娛樂圈後學氣功。」夏雨指有時間一定會出席對方的喪禮。