【專訪】森美13歲兒子愛睇政治嘢：我要同佢哋講，屋企冇民主㗎！

廣告成日都話「子女好與壞，在乎溝通與關懷」 ，講就識講，你估易呀？
天底下最難搞的其中一個難題就是親！子！關！係！太Close又唔聽你教，太嚴又會有隔膜，到底想同孩子做朋友係咪真係比登天更難？
森美今年書展推出處男親子書《提早跟孩子做朋友》，綜合十幾年湊仔經驗，話你聽做個有霸氣又親民嘅家長其實唔難！
攝影：龔慧

森美今年書展一口氣出三本書，將過去的專欄整理分類做三個題材，《做魚毛都要做得享受》講享受生活，《暖男之規條》用理性分析愛情、《提早跟孩子做朋友》就講親子關係。生活同愛情森美就成日都講㗎啦，但親子？真係好罕見喎。

以前喺節目冇講過小朋友同屋企，寫文都盡量唔寫，主要係屋企唔鍾意啦，有時寫作點都會有誇大成分，小朋友啲同學睇到，會話我啲仔仔女女，到依家大個喇，佢哋開始明就可以寫下，但有時寫啲佢哋唔啱嘅嘢，佢哋都會唔鐘意㗎。

森美早年甚少講家庭事，甚至因此被誤會瞞婚，實情是為了保護家人，到現在囝囝已經13歲，來年將到外國升學，囡囡9歲亦算是已懂事的年紀，在與太太達成共識下，家庭話題總算「解封」。

屋企要行家長制

森美坦言讀中二囝囝已經好早熟，好喜歡看新聞和時事，甚至認得所有立法會議員：「我細個識鬼咩，所以我都會同佢哋講政治、講自由，譬如自由係喺邊度用。」森美停一停，繼續說：「我要同佢哋講屋企冇民主㗎！」

又話出書教人同子女做朋友？咁咪即係講一套做一套？冷靜啲，森美所言是有根據的：「我會教佢哋民主係社會制度，係一齊定立一個目標，再去一齊生活嘅。」打個譬如就是如果一家五口，三個兒子都愛食雪糕做晚餐，豈不是餐餐食雪糕？後果可想而之。

排除了民主，森美認為家中最適合推行的，始終都是家長制度，當然家長制只是為了方便落決定，還有在仔女做錯事後作出懲罰：「如果行朋友制，你諗下朋友喺你做錯事之後會做咩？一齊錯囉，所以我講得好清楚㗎，屋企只有定立政策時先有家長制度。」

請仔仔緋聞女友食飯

成日都話依家啲小朋友越來越醒，所以要實行家長制同時又保持朋友關係，也是家長要學的相處藝術，森美其中一個做法就是投其所好，囝囝鍾意打機就同佢打機，鍾意睇電視就一齊電視，仲會時不時關心小朋友的感情狀況。

我成日都問囝囝有冇愛情。

森美同時自稱是一個「好Open」的爸爸：「我成日都問囝囝有冇愛情，有時佢有啲傳緋聞嘅女仔，我會請佢嚟我屋企食飯。」他笑言自己三年班就寫第一封情信，中二就開始拍拖，所以總是很擔心囝囝將愛情「衾埋」：「因為越係衾埋就越易將愛情神化，神化咗就好易覺得嗰樣嘢冇辦法解決，但我又唔會刻意問，越問佢就覺得你煩，越煩佢就越唔想講你聽。」

談到「中學生不應談戀愛」這個「本世紀最大爭議」，森美就覺得當孩子有愛的感覺時就應該無法阻止：「不過相處方法可以教到佢，我覺得幾多歲去拍拖就冇時間限制，幾多歲有性生活就要教喇，呢個有影響嘅！」