【專訪】森美有抑鬱兼專注力失調　做條快樂魚毛：做咩都要有目標

最近有沒有覺得諸事不順，做什麼事都提不起勁，感覺對這個世界沒太多貢獻？不要擔心，因為在在浩瀚的宇宙中，你不過是微塵已而。
睇到依到唔好灰住先，既然世事如此，咪唔好理咁多囉，不如對自己好一點，森美最近推出了本新書教人《做魚毛都要做得享受》，無錯你就係魚毛，但如何做魚毛都做得快樂，就睇你造化喇。
攝影：龔慧

Google下都知，森美曾受抑鬱症困擾三年之久，或者你會問一個有抑鬱底的人怎樣教人快樂啊？森美在訪問時就親自解答：「我個底永遠都抑鬱底，加上專注力失調，要持之而行去做一件事對我嚟講好難，冇嘅，都市人個個都係咁㗎啦，所以我就要諗一啲方法去令自己開心快樂，集集埋埋，一年入面幾十個有用嘅方法。」

食牛扒都要高層次

書中的文章其實大部分都是森美為報章雜誌寫的專欄，在談討快樂之前，森美喜歡教人調節心態，他坦言過去對工作的概念好簡單，開咪就開咪，拍劇就拍劇，做節目就做節目，聽落冇咩目標，渾渾噩噩咁。他表示：「當你嘥咗時間，你咪炆囉！咁我哋點樣善用自己時間呢？就係每做一件事都要問自己點解要做果件事，做每件事都要有個目標。」

聽落好簡單，實踐的例子都有，森美話食每餐飯之前不要單純想要食飯：「譬如你食牛扒，你要諗試下塊牛扒係咩味，每一啖都慢慢地品嘗，當然你都可以諗食塊牛扒會換來好多營養，但你意義愈set得高，個時間就愈用得好，咁你個層次就會愈高喇。」

原來食餐飯都可以咁有意義，我真學到好多嘢呀！咁其實每日一篇「正能量」是否森美為時間增加意義的方法之一呢？森美反而形容「魚毛文章」是兩刃刀：「佢幫到我，做完之後抒情到好開心，同一時間當你諗唔到嘢寫，就好辛苦。」他坦言曾經試過一日坐3-4個鐘都無靈感寫稿，有時坐在沙發上思考，想到睡着，愈近交稿時間就愈痛苦，後來開始習慣在生活中尋找有趣的題材記住。

想出書用經歷影響生命

講起題材，森美心入面一直都有個好想寫的題材，就是一本教讀書方法的書，森美自言因為專注力失調的關係，自小讀書就好辛苦：「所以我好想寫一本關於專注力失調嘅人點讀書，我讀書唔係好，都叫讀晒小中大學，過程好辛苦，但我都搵咗好多方法畀我自己讀。」他表示一方面想為有同類型病的小朋友提供解決方法，另一方面想家長了解到這個問題，再作出相應的方法去幫助小朋友：「但一直未有好的起心肝去寫，我冇個信心。」