九記牛腩熱水$16杯？網民稱離譜：係想你買嘢飲　1原因有人撐合理

九記牛腩可說是香港牛腩的代名詞，不但是擁有近百年歷史的老店、米芝蓮推介光環，還是清湯腩的始創者，威水史一大堆！不過，近年九記無論食物質素及服務態度都被網民批評每況愈下，繼早前被內地女大鬧服務態度差後，近日又有網民指餐牌上顯示熱水都收$16，一眾網民高呼離譜，指入茶記俾杯水好基本，不過也有網民指合理，即睇網民點講！

九記牛腩熱水$16杯

近日有網民在Facebook群組「香港茶餐廳及美食關注組」中分享，發現中環老字號九記牛腩飲杯水都收16蚊，大呼離譜：「不如淨係賣熱水咪得囉，一定賺得多過而家！」

網民：俾杯水係基本

帖文一出，即引起大量網民共鳴，直指好反感，「客人入去食飯，俾杯水都好應該，呢啲餐廳我一世都唔會幫襯！」不少網民表示香港老字號茶餐廳愛借名氣劏客，「就係唔想你免費要杯水唔買嘢飲嘛」、「逼你飲牛肉湯」、「冇環境，冇服務，連水都收廿蚊真係好ｘ街」，亦有網民反諷指，水同汽水價錢一樣，你就會覺得汽水好抵，做生意手法高明！

九記牛腩曾吸引不少名人幫襯，說得上是星級食府，連梁朝偉、周潤發鍾鎮濤、余文樂、任賢齊、向海嵐及蒙嘉慧等明星都慕名而去。
點擊下圖看更多相關圖片▼ ▼ ▼

有人撐九記牛腩願者俾錢無問題

雖然網民反應普遍一面倒力插，不過仍有熟客力撐九記牛腩，指店家明賣明買，標到明，願者俾錢無問題！此外，他還指九記指的「水」，不是樓主所講的「一杯熱水」，其實是大支樽裝礦泉水，九記向來沒有杯裝熱水供應，如果是樽裝水，收$16仍屬可接受的價錢。又有人指，香港寸金尺土，餐廳此舉正是杜絕淨飲吹水陪坐人士，做法也屬情有可原。