【異形‧聖約】MX4D「震撼」衝擊體驗　異形現身有煙有異味

期待已久的《異形．聖約》（Alien: Covenant）終於上映，好奇之下走去挑戰4月中裝修重開、擁有現時全港唯一MX4D院的太古康怡MCL戲院，來個動感椅初體驗！雖然說是4D，但畫面是2D，不用帶專用眼鏡，座位就比平時寬闊兼且高，右邊有個緊急停止鍵，但據知按了後5秒張震動椅先會停。票價比普通3D貴少少，大約港幣145元左右。

如同平日睇戲買汽水零食入場，一開場就有少許後悔，因為跟住戲中飛船起飛降落，進食難度大幅提高，有幾次都無法命中目標（自己個嘴）。在這不便劇透太多，不過要知道《異形．聖約》是一部科幻驚慄片，大量太空船撞擊還有被異形撲倒是常識吧。有好多人怕睇4D背後會受重擊，其實都算溫和，感覺似揼骨按摩椅調到中至小模式，酸爽酸爽的。

記得坐飛機要將行李放前排座位下嗎？睇MX4D戲都要做一樣動作，否則左右前後搖擺包包會飛出去。人呢？就不會，就算冇安全帶都安全。搖下搖下，令人懷念起海洋公園曾幾何時的超動感影院。

講到最新鮮，自然是有味，無錯，電影落雨觀眾會聞到草腥味，至於異形的味道…大家要自行入場聞聞，總之係異味啦，聞一聞特別醒神。另一點就要講個「噴」字，首先有幾場噴煙戲，銀幕有銀幕噴，戲院有戲院噴，戲內戲外都煙霧瀰漫，對觀影有些許阻礙，有時微微嗆鼻。正如上段所說，邊睇《異形．聖約》邊飲飲食食真是不太明智，避得過噴煙，避不過被異形口水噴面，簡直嚇死朕！過程中應該不小心吞了幾口，與異形間接交換唾液，那種感覺真是難以明言。除了口水，還有機會中爆血彈（當然也只是無色無味的清水），完場濕了一面，又幾好玩。

總體而言，《異形．聖約》十分適合睇MX4D，充分運用到這些動感座位的特效，上述體感以外，另有閃電、吹風、掃腳位等等，與劇情高度配合。最意外的驚喜，是因為觀眾都專注應付各種4D體驗，留心劇情發展，全場聽不到有人問「點解嘅？」聽不到男友向女友將《異形》系列由頭到尾講一遍，令人感動。