金像獎2023紅地氈｜陳可辛攜17歲愛女陳是知出場　答問題勁怕醜

《第四十一屆香港電影金像獎頒獎禮》今晚（16日）舉行，陳可辛都有現身行紅地氈，更偕愛女陳是知（Jillian）登場，見Jillian撓住爸爸手臂，十足嫁女一樣，但媽媽吳君如就冇到場。昨日剛過17歲生日的陳是知以黑色低胸西裝現身，被問到想與哪位男演員合作，她以眼神向陳可辛求救，怕醜地說：「我唔知呀......」又表示自己喜歡Harry Styles。網民都大讚她亭亭玉立，笑容甜美。

金像獎2023得獎名單更新

事後兩父女再接受傳媒訪問，陳可辛指自己非頒獎嘉賓，只是負責典禮其中一部分。Jillian首次正式行紅地氈，當問到囡囡是否準備入行、會否有想合作演員的清單時，她顯得十分害羞，陳可辛就代答：「佢啲清單好難達到，佢係Harry Styles嘅Number 1 fans，所以我要打出國際先幫到佢！」由於Jillian的服裝都有少許性感，被問吳君如事前有否先過目，陳可辛笑指：「媽咪直情係Styling啦，何止過目？」又透露因為今年君如冇負責金像獎任何崗位，所以就冇到場，對於日前兩公婆與奧斯卡影后楊紫瓊聚餐，陳可辛亦指見返好多老友好開心，期待有機會與楊紫瓊合作。