《殺神John Wick 4》甄子丹煞科不捨劇組　奇洛李維斯︰返屋企啦

由奇洛李維斯（Keanu Reeves）主演的系列電影《殺神John Wick 4》，自公布邀得「宇宙最強」甄子丹參與後，一直受香港人關注。今日甄子丹在IG出片，表示經歷4個月拍攝時間，自己的戲份經已完成，終於可以返香港見老婆仔女，而片中更展出他跟奇洛李維斯的合照。

影片一來，是甄子丹在車上自拍，高興表示歷時4個月的拍攝時間已經完成，可以返屋企跟太太和仔女見面，他稱今次拍攝過程非常有趣，更約定大家到時戲院見。

鏡頭一轉，影片拍到他回到休息室時，收到奇洛李維斯一份禮物，包括一支印有「Thank you Donnie. You’re the best. Keanu」字樣的長笛，同時又收到他跟導演Chad Stahelski聯名送出的Tee。最後鏡頭代表甄子丹拍完煞科後，逐一向導演、奇洛李維斯等人道別，他更與奇洛李維斯來個擁抱及自拍。甄子丹跟奇洛李維斯講不捨得團隊，但真的要回家了，殊不知奇洛李維斯搞笑地回應︰「Go Home！（返屋企啦）」場面相當搞笑。